Prins Bram I en Dansmarietje Lisa

Op vrijdag 6 januari 2012 is Bram Clevis uit de kei gesprongen als Prins Bram I van de Arcense Keieschiéters. Hij werd tijdens de vastelaovend bijgestaan door dansmarietje Lisa Peute.

 


Proklamasie Prins Bram I

Weej, Prins Bram d'n Örste,
- Beej de grasie vân de Raod vân Ellef,
- Prins vân Ârce, zônder Lômm en Vélde,
- Groëtvôrs in de Orde vân d'n Ârcese Kei,
- Kommandeur in de Orde vân d'n Hoephap,
- Beschaeremhiër vân 't zwakke geslach oët ’t Wilde Weste.
- Ridder in de Orde vân de Lage Lei,
- Groëtmeister in 't tappe vân hiël völ saorte Hertog Jan beer in kefee “De Proeverij”.
- Keurvors in de horekakemissie vân De Keieschiéters,
- Maarschalk ôp ’t voetbalvéld in ‘t All Stars tiém vân DEV-4,
- Goeverneur in ’t bestuure vân ’t beergilde BNB,
- Hiële grötse vader vân de kiezelstiëntjes Isa, Tren en Sil.

Alzoë weej in ovverwaeging genaome hebbende, dât 't dinstig is um verordeninge te treffe in 't belang vân ôs ônderdane, gelet ôp 't bepaolde in artikel ellef vân 't vastenaovesriggelemént, verordene weej en doon te wiëte,

Ten örste:
Dât ik bliej bin dât ze dit jaor mit de “Oktoëberfiëste” de kloés hebbe laote staon, dao zoot zoë-âs ge zuut, namelik wâl 'n hiël groët geheim in….

Ten twedde:
Dât de sleutelaoverdrach ni miër ôp karnevalszôndig én ni miër in 't áld Gemintehoés plâts meug vinde, is betreurenswaerd. Giët de geminte Venlo nag miër alde tradisies ovverbaord goeëje ???

Ten derde:
Dât ik ’t afgeloëpe jaor al 'n paar kiër in de Limburger heb gestaon, mâr dât dât neet ôpwug tegge 't feit dât ik nów ôp de veurpagina stuj vân d'n ennigen echte Keieschiéterskrant.

Ten verde:
Dât ik haop dât d’r zôndig 29 jannewarie aanstaonde, beej 't 4 x 11 jaörig jubileum vân de Alde Wiéver, hiëlvöl vrouwluuj ziech ôppakke um d’r wer unnen alderwets gezelligen daag vân te make.

Ten viefde:
Dât DEV ’t afgeloëpe jaor zoëvöl in ’t ni-js is gewès dât me ziech áfvrug of d’r ni miër voetbalklubs in de gemínt zien ???

Ten zesde:
Dât de letste edisie vân Scrooge wer 'n veurbeeld is vân dât we heej in Ârce same alles kunne.

Ten zivvende:
Âs de Raod vân Ellef mich kwiét is mit de karnevalsdaag, ze ni völ mujte hôvve te doon um mich te vinde, en dât kump ech neet alliën door die vaere…

Ten achtste:
Dât, âs we dit jaor wer zon fantastiese diëlnemers en zon fijn waer hebbe mit de ôptochte, 't groëte karnevalsfiës op maondig nao afloëp vân d’n ôptoch heej in dizze zaal, al beej veurbaat ni kepot kân.

Ten niggende:
Dât ok mien vriendeklub “KeiGammel” dit jaor vól ân d'n bak môt um d’r same mit alle karnevalsviërders 'n ônvergaetelik fiës vân te make.

Ten tiende:
Dât miene pap, Prins Henk d’n Őrste, in 1988 waor, ziene zoën Bram Prins in 2012. De kreet: “Jônk geliërd is alt gedaon” giët beej de femílie Clevis zeker ôp.

Ten ellefde:
Dât ik mien oéterste baes zal doon um, same mit mien Dansmarietje Lisa, ma ôk same mit oow allemaol, karneval 2012 te make tot un fiës waor we nag lang ovver nao zulle praote.

Aldus gegaeve te Ârce, Vastenaovend 2012,
Prins Bram d'n Örste.

Web-id
De Keieschieters

Òntworpe & Aangedreeve door Web-id
Copyright © 2018 De Keieschiéters Ârce
Vragen of opmerkingen over de inhoud kunt u sturen naar webmaster@keieschieters.nl