Proclemasie

Weej Prins Roel d’n twedde

Beej de grasie vân de Raod vân Ellef,

Príns vân Ârce zônder Lomm en Vélde,

Groëtvórs in de Orde vân d’n Ârcese kei,

Kommandeur in de Orde vân d’n Hoephap,

Verdediger vân de gael-greune kleure,

Beschaeremhiër vân ’t zwaake geslach vân de Pastoër Houbenstraot,

Steunpilaar vân de kemissie Kiénderkarneval,

Groëtmeister in ’t bezeuke vân konsérte,

Keurvors vân de zomeraovendvoetballers vân Micha Peute,

Ridder in de Orde vân de pastoër Schrammstraot,

Leefhebber vân alles wât mit alde wages te make haet,

Groëtmeister in ’t knauwe vân door mich zellef verkaochte kauwgum,

Alzoë weej in ovverwaeging genaome hebbende,

dât ’t nuüdig is um verordeninge te treffe

in ’t belang vân ôs ônderdane,

gelet ôp ’t bepaalde in artikel ellef vân ’t vastenaovesregelemént,

verordene weej en doon te wiëte:

Ten örste:

Dât weej ôzze ni-jen burgemeister al aardig liére kenne.

De meniër waorôp haen Sinterklaos ôntving spraok ôs allemaol aerig aan.

En verder kump haen aover âs unnen hiële serieuze mán daen ziech neet ôphilt mit ônderbôkselol en humor daen weinig um ’t liéf haet.

Ten twedde:

Dât d’r nao jaore eindelik ’n ôplossing liek aan te kômme vör ôs hangjeugd.

Mâr dât weej mit allemán wâl beni-jt zien of ze d’r ok gebroek vân zulle make.

’n Komplemént vör Jông Ârce is in ieder gevál wâl ôp zien plâts.

Ten derde:

Dât d’r ’t áfgeloëpe jaor aardig ân de fietspaéj is gewaerikt in ôs daörep.

Baoven ân de grens kwaom d’r unne moëje wielerwaeg

en ok richting ’t Aegelder woord alles good ôpgeknap.

Alliën vônde weej ’t wâl vremd dât daor die vaerikesrugskes wer vân stál zien gehaald.

Ten verde:

Dât weej hebbe gekonstateerd dât de Gemínt d’r völ ân gelaege is um ôs daörep verkiërsveiling te make.

Gáns Ârce 30 kielemaeterzône, bloombek ôp de Laakwaeg en beej ’t binnekômme vân ôs daörep waegversmalinge geplâts. Iëne vör de zekerheid zellefs twië kiër.

Ten viefde:

Dât weej hebbe gemaerikt dât ’t gaat in de Maasstraot ok vör wât ellende haet gezörrig.

’t Verkiër wordt al monde umgeleid, sommige huús vertoëne scheure in de more en wât te dínke vân ôzzen ôptoch? Kunne weej d’r dân al door, of kômme we ân ’t kluune?

Ten zesde:

Dât weej mit spanning oétkiéke nao de kômmende Geminteraodsverkiezinge.

Zal de kowaliessie vân now stándhálde of slaon ’t CDA en de VVD terug?

En wât te dínke vân die ni-j partiej: Laefbaar Ârce, Lômm en Vélde?

Of make die ziech alliën mâr druk ovver die hoëgwatergeul in Lômm?

Ten zivvende:

Dât weej heer in Ârce ovver unne profiët beschikke: want toen mien vriendin in 1997 dansmarietje waor, zei eure Prins Matthijs tegge mich, dât ik ovver viéf jaor ân de beurt zuj zien. Haen haet geliek gekrege!

Ten achste:

Dât ôzze wethalder vân grôndzake ’n bewaoge jaor achter de rug haet.

Örs die probleme mit dât stuk grônd in Vélde.

En dân d’n trammelánt ovver ’n stuk grônd in Ârce, dât wâl of gen bouwbestemming haet.

Al krieg haen door die letste zaak via d’n tillevizie wâl landelikke bekendheid.

Ten niggende:

Dât de gúlde vörgood oét ôs portemonnee is verdwene en dât we allemaol ân d’n Euro zulle môtte wenne. Gelukkig is ôzzen eige keihârde múnt d’n Arcént wâl bliéve bestaon en kunne weej dao mit de vastenaovend gewoën mit betale.

Ten tiende:

Dât pestoër, nao ’n deepgaond ônderzeuk, haet gekonstateerd dât ’t baeter en veurdiëligger is âs de kaerik iëne kiër hállef vól zit, dân twië kiër vör ’n kwart en dât d’r daorum alliën nog mâr ôp zaoterdiggenaovend ’n Heilige Mis is.

Behalleve ôp hoëge fiësdaag zoë-âs Passe, Kersmis en natuurlik Vastenaovend, dân ziet geej ok ôp zondig welkôm.

Ten ellefde:

Dât ik same mit mien dansmarietje Steffie ’t vólste vertrouwe heb in alle Keieschiéters,

dât ze ok dit jaor wer zörrige vör unne gôjen ôptoch en unne nette en unne fatsoenlikke Vastenaovend mit völ lol en plezeer.

Gegaeve te Ârce, Vastenaovend 4 jannewarie 2002.

Prins Roel d’n Twedde