Os hoëghede

Proclemasie

Weej, Príns Edward d’n örste,

Beej de grasie vân de Raod vân Ellef,

Príns vân Ârce, zônder Lômm en Vélde,

Groëtvors in d’n orde vân d’n Ârcese Kei,

Kommandeur in de orde vân d'n Hoephap,

Beschaeremhiër vân ’t zwake geslach vân “aan de Poel”,

Groëtmeister in de orde vân ’t Trômmelkórps,

Keurvors vân alle pielkesgoëiers beej de bedriévekompetisie in ôs dartkefé,

Reddenden engel vör alle Pruúse en Pruúzinne die verlaege zitte um ’n slaopkamer, unne kás of ’n bánkstel.

Groëtmeister in ’t rustig rôndtoere ôp miene motor, door ôs prachtig Limburgs lánd.

Ridder in de orde vân de Alde én de Jông Gild,

Groëtvors in de orde vân de Dominee Kingstraot,

Keurvors vân alle beunhaze, die âs Zwarte Piet door ’t laeve gaon beej de decembergroep.

Groëtmeister in ’t ôp de juuste maniër ôp de trôm houwe beej ôs Hofkapel,

Ridder in de orde vân vriendegroep de Labusse,

Kommandeur in de orde vân mannekoër ’t Remspaor.

Alzoê weej in ovverwaeging genaome hebbende, dât ’t dinstig is um verordeninge te make in ’t belang vân ôs ônderdane, gelet ôp ’t bepaalde in artikel ellef vân ’t vastenaovesriggelemént, verordene weej en doon te wiëte:

Ten örste:

Dât de Gemínteraod d’n burgemeister ôp de vingers haet getikt nao zien flirt mit Venlo. Mâr dât diezellefde Gemínteraod neet môt vergaete wât de reeje vân daen flirt waor. In ieder gevál is de kreet Ârce, Lômm en Vélde beej Venlo dât noëit, aktuweler dân dât ôs dât leef is.

Ten twedde:

Dât Ârce d'r, nao de Lingsfort en ’t Knikkerdaörep, ’n buurtschap beej haet gekrege, al vind ik de naam Baad Ârce neet ech Ârces klínke.

Ten derde:

Dât de liefde tusse D.E.V. en D.S.O. wât korter gedeurd haet dân iederiën verwách hâj, mâr dât ik wâl haop dât ze âs gôjje vriende oét mekaar gaon. Unne gôjjen buur is baeter dân unne verre vriend.

Ten verde:

Dât ik in apríl in Tante Bet heb gelaeze dât de Gemínt de Rabobánk haet gekaóch, umdât ’t Gemíntehoés te klein is vör ál ’t perseniël. Dât diezellefde Tante Bet in oktoëber meldt, beej mônde vân wethálder Geurts, dât d'r tién volledige bane geschrap gaon waere beej de Gemínt. Bin ik nów bleud of snap ik ’t gewoën neet.

Ten viefde:

Dât hiël völ Ârcenare unne prachtigen daag hebbe gehad mit de fietsdaag mit daorin verwaerikt ’t straottheater. Vânáf dees plek wil ik gaer ’n groët komplimént oétbrenge ân de organizasie en spraek ik de wíns oét dât dizzen daag neet sneuvelt door de bezuiniginge.

Ten zesde:

Dât ik gekonstateerd heb dât ’t Ovaal teggewaorig toch vör allerlei doeleinde gebroek wört. ’n Jôngere hangplek waor ’t al, ’n Zjeu de boel-baan môt ’t in de toeköms waere en ôp ’t momént haet ’t sirrekus eur ténte d'r ôpgeslage. Ik bin in ieder geval bliej dât nów toch örges vör gebroek wört.

Ten zivvende:

Dât ik ’t kân waardere dât ’n Raodslid krities is nao zien kollégaas en ’t kolleezje. Mâr um dân via ié-meejl allerlei neet te ônderbouwe beschuldiginge te gaon spui-je vind ik ech iets vör de drie OOO´s: ôngepast, ônnuuëdig en vörál ônfatsoenlik.

Ten achste:

Dât ’t mich deugd deut dât de Alde Hoeve eur deure wer haet geaöpend en dât ik vânáf dees plâts de ni-je oétbaters hiël völ suksés wil toewínse. ’n Prachtig pánd ôp ’n prachtige lokasie, verdint ’n prachtige toekôms.

Ten niggende:

Dât de Gemínt in ’t kader vân de toekômsvisie 2015 druuëmvluchte haet geörganiseerd vânoét Vélde. Druuëmvluchte “bouwve” Vélde: náchmerries zulle ze bedoele!!!

Ten tiende:

Dât Ârce d'r dizze wínter wönderlik moëi verleech beejleet. ’n Good iniesjatief vân ôs ôndernemers. Nao de zomerse sfeermaérte hebbe we nów ok ’n wínterse aktiviteit die ôs daörep wer is unne kiër regionaal pozitief in ’t spotleech zet.

Ten ellefde.

Dât ik tot miene groëte spiét môt konkludere, dât ’t ovver 32 daag alwèr Aswoensdig is. Mâr dât ik oow kân verzekere dât ik d'r same mit mien dansmarietje Elle vör zal zörrige dât de Vastenaovend vân 2005 âs unne vólwaardige vastenaovend in de geschiedenisbeuk zal waere beejgeschreve.

Aldus gegaeve te Ârce:

Vastenaovend 2005

Príns Edward d’n Örste