D’n ôpstaeker 2022

Beeldend kunstenaer Sabrina van Wijlick oét Belfeld haet vör de Vastenaovend 2022 d’n Ôpstaekerᵀᵐ ôntwaorepe. Ron van Zoest, veurzitter van de Belhamels vroog Sabrina um dit jaor oét naam van alle viéf de stadsdiëlvereniginge d’n Ôpstaeker 2022 te ôntwaerepe.

Eur ôntwaerep is ’n aope hârt mit daorumhin ’n zaag, simbool vör de (wage)bouwers, unne pienzel vör de grimeurs, de traot en de solsleutel vör de muzikánte en natuurlik de vlaag die vânáf Aldewiéverdaag wer oét meug. ’t Aope hârt löt de kleur vân ’t pekske vân d’n drager zeen. Dit ôntwaerep is oéteindelik door de vorste vân de viéf stadsdiëlvereniginge gekaoze.

D’n ôpstaeker is ’n saort brosj, dae stiët vör ’n drietál zake: Unne bliék vân waardering völ ál die vreejwilligers die allemaol die vastenaoves-aktiviteite organisere, in de stadsdiële Venlo, Bliérick, Tegele, Belfeld en Ârce. Unne bliék vân betrokkenheid beej de vastenaovend en unne finansjelen ôpstaeker vör de vastenaovesvereniginge in dees regio. De viéf stadsdiëlvereniginge haope dât de inwoëners, net wie veurgaonde jaore, wer massaal dizze vastenaovesbrosj zulle koëpe um daormit de vastenaovesaktiviteite vân de vereniging te ôndersteune.

Vör € 5,00 is haen beej alle ivveneménte vân de vereniging en beej de Fa. Cup te koëp.