Os hoëghede

Proclemasie

Weej, Prins Hans d’n Twedde,

Beej de grasie vân de Raod vân Ellef.

Prins vân Ârce, zônder die vân Lômm en Vélde.

Zoeën vân Hans en Frieda Siemes en grötse pap vân Tuur en Yara.

Groeëtvors in de Orde vân d'n Ârcese Kei.

Kommandeur in de Orde vân d'n Hoephap.

Beschaeremhieër vân 't zwake geslách vân de Keieschiéterinnekes vân de Ni-j Ervewaeg .

Ridder in de Orde vân vriendegroep “de Oétsmiéters” en karnavalsgroep “Zoeë gezág”

Keurvors in ’t speule in de zándbak beej Siemes Sand- und Kiesbaggerei in Pruússe.

Groeëtmeister in ’t houwe ôp de dieke trôm beej de slaagwaerikgroep vân ôs Keuninklikke Hermenie.

Gouverneur vân ’t vettig make vân mich zellef en miene mountenbaik ôp zôndigmaerge.

Ridder in de Orde vân de kwakers beej DEV nevve de lién beej miene zoeën.

Alzoë weej in ovverwaeging genaome hebbende, dât 't dinstig is um verordeninge te treffe in 't belang vân ôs ônderdane, gelet ôp artikel 11 vân 't vastenaovesriggelemént, verordene weej en doon te wieëte,

Ten örste: Dât de Gemínt ôs âs vereniging hoeëg haet zitte, bliekt wâl oét de groeëte Ârcese keie die beej ôs moeëje watermeule ligge. Allieën haop ik dât ze nów ok ’t parkeerprobleem geliek mei aanpakke.

Ten twedde: Dât de waegwaerikzaamhede in ôs daörep aerig veurspoedig zien verloeëpe, mâr daorintaege beej de rotonde ’t wâl lang haet gedeurd. Wannieër dâs-se gôodkoeëp wees ténke in Pruússe se âsnog deur oét bees door de umleiding die se môs reeje en de wage wer môs wasse.

Ten derde: Dât ik vân meining bin dât ’t baeter is dât de busroete verplâtst is, mâr âs-se d'r nów unne gieës drínke beej de brouwereej en doe môs mit de bus naor hoés, bees-se neuchter tegge d’n tiéd dâs-se beej de halte bees.

Ten verde: Dât schejje vân plestiek afval ’n gôje zaak is, mâr ’t is ’n kwaolikke zaak dât weej langen tiéd vör de gek zien gehálde. Ik haop dân ok dât die zek ’n gôj ôplossing zien.

Ten viefde: Ôs hermenie haet wer ’n prachtig Top 2000 konsert gegaeve waor Ârce gröts ôp meug zien, mâr dât ik haop dât ’t leejeaantal vân dees moeëje hermenie d'r neet ôp áchteoét gieët.

Ten zesde: Dât ôs jeugd vân DEV same voetbalt mit Lômm is tot daor ân toe, mâr dât we nów ok nag naor Vélde môtte um te voetballe? Ik dooch áltiéd dât ’n hobbie leuk moos bliéve.

Ten zivvende: Dât ik bliej bin dât ’t leejeaantal vân de Zjeu de boel klub mieër wört. Mâr dât ze dao wâl ni-je fitnesapparate vör nuuëdig hebbe um fit te bliéve vind ik wâl wât ovverdreve.

Ten achste: Ôs kastieël waor al moeëj, mâr nów mit ál dat leech ôp dae wándelpaad is ’t kastieël in d’n aovend en de waeg naor de bushalte nag moeëjer en veiliger gewaore.

Ten niggende: Dât ik ’t jaomer vind dât d’n dínsdig vör mich en mien Dansmarietje Demi offisjeel de letsten daag wört en dât ôs Boétegeweste zien kômme te vervalle. Mâr ik bin aerig bliej te kunne vermelde dât dizzen daag nów wört ingevuld âs themadaag, mit âs thema: boore en boorinne.

Ten tiende: Dât ôs wagebouwers unne gánse ni-je wage mit ônderstel vör mich hebbe gemâk bin ik ôntzettend gröts ôp. Ik haop dât weej mit dizze wage wer ’n paar jaor veuroét kunne.

Ten ellefde: Dât ik tot miene groeëte spiét môt konkludére dât ’t ovver 3x11 daag alwèr Aswoensdig is. Mâr dât ik oow kân verzekere dât ik d'r same mit mien Dansmarietje Demi vör zal zörrige dât de Vastenaovend vân 2024 âs unne echte Vastenaovend in de geschiedenisbeuk zal waere beejgeschreve.

Aldus gegaeve te Ârce 12 jannewarie 2024,

Príns Hans d'n Twedde