Inluuje vastenaovend

Offisjele aöpening vân de Vastenaovend

In samewaerking mit de Hertog Jan Preuvereej, de Hertog Jan Brouwereej en Karnevalsvereniging "de Keieschiéters" Ârce luuje weej vriediggenaovend ôp gepaste wiés de Karneval in. De start is um 20:11 oor in de Vaate-ruumte waor de leiding vân de Hertog Jan Brouwereej ôs welkôm zal heite. ’n Urke intieme gezelligheid mit meziek vân de hofkapel en ludieke spietsjes aover en waer. Ok zal d’n hoëgheid vân dit seizoen ’t örste glaas beer tappe âs offisjele aöpening vân de Vastenaovend. Aansloétend giët ’t fiës wiër in de Hertog Jan Preuvereej.

’t Inluuje wört aangebaoje door de Hertog Jan Brouwereej en de Hertog Jan Preuvereej. Zoëwâl ’t inluuje âs ’t fiës ôp de Preuvereej is alliën toegankelik vör genuuëdigde. Dit zien ôs gewârdeerde vreejwilligers, artieste en muziekánte vân de zittinge en Ouverture en alle ôptochdiëlnemers en de door de brouwereej en/of preuvereej genuuëdigde gaste. ’t Ennige wât weej âs Karnevalsvereniging vraoge is toegang ôp vertoën vân d’n Ôpstaeker, waormei-se aantoëns dâs-se de Vastenaovend ’n waerem hârt toedrugs en de vereniging finansjeel ôndersteuns.