D’n Bônten Hoephap

Ôp de jaorlikse Ouverture vân de karnevalsvereniging wörd d’r unnen Ârcenaar publiekelik in ‘t zunke gezatte um eum of eur te dánke vör de groëte verdinste ôp allerlei gebied. D’r dint spraoke te zien vân unne belangelozen inzet. Dizze persoën krieg dân âs bliek vân waardering, ‘n prachtig bônt aerdewaerik beeldje oétgereikt. D’n bônten Hoephap. Dit jaor waor ‘t bestuur vân de Keieschiéters vân meining dât Mart Vullings dees iër te beurt moos valle.

Waorum Mart Vullings?

Mart haet ziech al hiël völ jaore biezônder aktief getoënd in ‘t verenigingslaeve in Ârce. Vör mennige vereniging haet haen ziech ôp hiël völ gebiede hiël verdinstelik gemâk. Mej âs be­stuurslid, duk ok âs waeriker achter de koeliesse. Zônder kompleet te zien wille weej daor is unnen indruk vân gaeve.

Mart is al 48 jaor lid vân ôs voetbaltrots RKDEV. Binne dees vereniging is haen o.a. bestuurs­lid gewès. Nevve ‘t lidmaatschap vân dees vereniging waor Mart 10 jaor scheidsrechter vân de KNVB, distrik Venlo. Ok ándere sportvereniginge meugden ziech gesteund wiëte door d’n inzet vân Mart. Zoë is haen al 28 jaor lid vân de tennisklub, waorvân 7 jaor âs bestuurslid. Ok de volleybalklub haet ân Mart unnen hiële gôjje. Mart bepaerikte zienen inzet neet alliën toet de sportsklubs. Ok ándere organisasies kooste dánkbaar vân zien dinste gebroek make. Zoë waor haen miërdere jaore leider en bestuurslid vân ‘t Kiéndervakánsiewaerik Ârce. 14 Jaor is haen ok al lid vân Arch Luit. ‘n Vereniging waor haen archivaris vân de muziekstukke vân is. Daorbeej is haen mei-ôprichter gewès vân Stichting het Gemeenschapshuis en is haen betrokke beej d’n tillefooncirkel. Unne naam haet haen inmiddels ok al ôpgebouwd in ‘t organisere vân fietstochte vör diverse vereniginge.

Oét ál ‘t baovestaonde kunne we konkludere dât Mart emus is, daen naodrukkelik zien sténtje haet beejgedrage ân ‘t Ârcese verenigingslaeve. Daor meuge weej eum dánkbaar vör zien. Want zônder d’n inzet vân mínse zoëâs haen, kunne vereniginge neet bestaon. Mart haet dizze Bônten Hoephap vân hârte verdind.

Profiesjat!