D’n Bônten Hoephap 1997

Mit de jaorlikse ouverture van de Karnevalsvereniging wört unne Ârcenaar publiekelik in ‘t zunke gezatte um eum of eur te bedánke vör de groëte verdinste vör de Ârcese Gemínschap.

Dees verdinste kunne ligge ôp allerlei gebied en dint d’r spraoke te zien van unne belanglozen inzet. Die persoën krieg dân âs bliek vân waardering ‘n prachtig bônt aerdewaerik beeldje oétgereikt: d’n Bônten Hoephap.

Dit jaor waor ‘t bestuur vân de keieschiéters vân meining dât Ger Kepser dees iër moos kriëge.

Waorum Ger Kepser?

Nevve zien druk bestaon âs ôndernemer haet Ger zich ôp ‘n hiël breid terrein en vör völ vereniginge ôntzettend ingespanne. In zien jônge jaore waor haen luitenant vân de schuttereej en sikkretaris vân de jeugdvereniging “Klimop”. Ok waor haen leider vân ‘t twed vân DEV. Vân de OVAL is Ger örs sikkretaris gewès en later veurzitter, in totaal 18 jaor. Verder waor haen mei-oprichter vân de standsorganisatie. Ok in de karnevalsvereniging haet haen zien spaore zeker verdind, o.a. waor haen 9 jaor veurzitter vân de kemissie kránt. Verder waor haen spraekstál­meister vân de wielerzesdaagsen. Neet vergaete meug waere dât Ger groëte beteike­nis haet gehad vör ôs parochiekaerik. Mit de akties “Ruiten troef”en “Klokke drie”haet haen mei bevorderd dât de kaerikrame beveiligd woorden en dât d’r un ni-je klok koos kômme. Ok vör de Hermenie haet haen inmiddels völ beteikend. Haen huurt tot de vrienden vân de Herme­nie en waor mei-initiator vân de aktie “Drieklank” en mei-organisator vân d’n Ârcesen daág, waorân de vereniging eur ni-j uniforme te dánke haet. Tenslotte is Ger lid vân de biljartvereni­ging Inaborg en lid vân de Gemengde Zangvereniging.

Alles beejiën dus unne enormen staat vân dinst.

Oét ál ‘t baovestaonde bliek, dât Ger zien talénte ôp aardig wât terreine vör ôs daörepsgemin­schap haet ingezatte. Daor meuge we eum dánkbaar vör zien. Dees dánkbaarheid kumpt ‘n bietje tot oéting in d’n Bônten Hoephap, daen haen dân ok éch verdind haet.

Ger proficiat!