D’n twellefde Bônten Hoephap vör Jeu van Giesen

Al vör d’n twellefde kiër woord dit jaor door ’t bestuur vân de keieschiéters d’n Bônten Hoephap oétgereikt. Mit de oétreiking vân dit prachtige bônte aerde beeldje wörd jaorliks unnen ârcenaar ge-iërd um eum of eur daormei publiekelik te bedánke vör zien groëte verdinste vör ôs daörep op maatschappelik vlak. D’r dint dân spraoke te zien vân unne belangelozen inzet. Dit jaor veel de iër te beurt ân Jeu van Giesen.

Waorum Jeu van Giesen?

Jeu haet in diverse verenigingen zien spaore ruúm verdint. Haen blinkt vörál oét in de lange betrokkenheid beej de betreffende clubs. Weej wille dao ôp dees plâts gaer unnen indruk vân gaeve.

Um te beginne is Jeu vân 1956 wies 1982 lid gewès vân de jeugdvereniging Jong Arcen. In daen tiéd is haen 21 jaor vaandrig gewès, is haen penningmeister gewès en haet haen meigehaolepe in de rinnevasie vân de Blokhut en beej de aktiviteite vân de jubileumkemissie. Um de belange vân d’n Bouwvak te behartige is Jeu 24 jaor lang kaderlid gewès vân d’n hóltbônd FNV.

Ok beej ôs plâtselikke voetbaltrots RKDEV haet Jeu behuürlik ân de waeg getummerd. Sinds 1959 is haen al lid vân dees vereniging. Nao ’n paar jaor jeugdlid te zien gewès, haet-ie ok ’n paar jaer in ’t örs gespeuld. Vân 1982 wies 1998 is haen jeugdleider gewès en vân 1987 wies 1996 zellefs veurzitter vân de jeugdafdiëling. Vân 1986 wies 1991 waor haen grensrechter. Daorbeej waor haen 15 jaor wedstrijdleider. Vör dit alles haet RKDEV Jeu al iërder benump toe lid vân verdinste.

Tenslotte haet Jeu ok beej ôs eigen karnevalsvereniging al duk zien baeste biëntje veur gezatte. Haen is lid vânáf 1976. Lid gewès vân de Raod vân Ellef, vânáf 1986 lid vân de ôptochkemissie en al 10 jaor beej de technische kemissie mit o.a. d’n bouw vân de prínsewage. In 1998 woord Jeu door de vereniging al gehuldigd vör zienen inzet.

Oét ál ’t baovestaonde bliek dât Jeu zien stiëntje naodrukkelik haet beejgedrage ân ’t geminschapslaeve in Ârce. Haen is iën vân die mínse wao weej gröts ôp kunne zien, want zônder dees mínse zujje weej in Ârce neet hebbe wât d’r nôw is.

Jeu….vân hârte profiesjat mit dizzen Bônten Hoephap.