D’n dertiende bônten Hoephap vör Henny Rheiter-Imming

Al vör d’n dertiende kiër woord dit jaor door ’t bestuur vân de keieschiéters d’n bônten Hoephap oétgereikt. Mit de oétreiking vân dit prachtige bônte aerde beeldje, wördt jaorliks unnen Ârcenaar ge-iërd um eum ef eur daormei publiekelik te bedánke vör zien groëte verdinste vör ôs daörep ôp maatschappelik vlak. D’r dint dân spraoke te zien vân unne belangelozen inzet. Dit jaor veel de iër te beurt ân Henny Rheiter-Imming.

Waorum Henny Rheiter?

Henny haet in verschillende vereniginge eur spore ruum verdind. Eur verenigingslaeve begoos beej jeugdkoër Laus Deo. Heejvân waor zeej 6 jaor lid. Vastenaovesblood zoot d’r zeker in Henny. Vân 1972 wies 1976 waor ze lid vân de prínsegarde, mit âs högtepunt dansmarietje in 1974. 22 Kiër deej ze mei ân d’n ôptoch mit de groep Alt Ârce. 6 Jaor waor ze leidster vân de kleine schavuiten.

Henny haet 9 jaor diël oétgemâk vân ’t bestuur vân Kindervakantiewerk Arcen, waorvân 7 jaor âs sikkretaresse.

In 1982 waor Henny mei-ôprichster vân ’t jôngerekoër waoroét later ’t koër Avolon is veurtgekômme. Vân ’t jôngerekoër is zeej 8 jaor sikkretaresse gewés. Ok haet ze 8 jaor in d’n teksgroep vân de jôngerekaerik gezaete. In dezellefden tiéd is ze 6 jaor lid gewés vân de parochieraod.

Vân 1986 wies 1995 waor Henny penningmeister vân de peuterspeulzaal. Vân 1987 wies 1995 waor ze vreejwilligster in ’t documentatiecentrum vân de schoël.

In 1994 traoj ze toe tot ’t bestuur vân de LVB. Vânáf 1996 wies now is zeej de veurzitster vân dees vereniging.

Nevve baovegenumde verenigingsaktiviteite coördineert Henny de jaorlikse kollekte vân de hârtstichting, is zeej kollektante vân de brandwôndestichting en is ze aktief in de aktie Coins for care.

Oét ál ’t baovestaonde bliek dât Henny ’n ôntzettend aktieve vrouw is, die eur stiëntje miër dân beejgedrage haet ân ’t gemínschapslaeve in Ârce. Zeej is iën vân die mínse waor weej gröts ôp kunne zien, want zônder dit saort zujje we in Ârce neet hebbe wât d’r now wâl is.

Henny…vân hârte profiesjat mit dizze bônten Hoephap.