De vertiende Bônten Hoephap vör Jan van Ooijen

Al vör de vertiende kiër woord dit jaor door ’t bestuur vân de Keieschiéters d’n Bônten Hoephap oétgereikt. Mit de oétreiking vân dit prachtige bônte aerde beeldje, wördt jaorliks unnen Ârcenaar ge-iërd um eum of eur daormit publiekelik te bedánke vör zien groëte verdinste vör ôs daörep ôp maatschappelik vlak. D’r dint dân spraoke te zien vân unne belangelozen inzet. Dit jaor veel de iër te beurt ân Jan van Ooijen.

Waorum Jan van Ooijen?

Jan haet in diverse verenigingen zien spaore verdind, zien verenigingslaeve begoos beej de verkenners vân Jông Ârce. Haen woord lid in 1958. Nao ’t doorloëpe vân de patrouilles en stam kwaom haen beej de staf. Haen is daorvân, mit ’n ônderbraeking tussen 1970 en 1973, lid gebleve wies 1983. In totaal is haen dus 22 jaor lid gewès, waorvân 12 jaor bestuurslid. Daornaeve waor Jan nag veurzitter vân ’t feestkommitee ter iére vân 't 40-jaörig bestaon vân de vereniging. In dât kader woord d'r ’n gigantisch fiës mit Henny Huisman georganiseerd. Oét de ôpbrengs koos de vereniging ’n jaor later mit 65 jônges nao Landeck.

De vollegende vereniging waorvân heer melding gemâkt wördt is ôs voetbaltrots RKDEV. Nao zien aktieve voetbalkarriejère woord Jan 4 jaor leider vân ’t viefde elleftal. Daornao is haen 10 jaor leider gewès vân ’t Örs. In daen tiéd waor haen ok mei-organisator vân de suksésvolle DEV-daag. In 1996 is Jan toegetraeje tot ’t bestuur vân RKDEV. Daorin haet-ie nag steeds zitting. Sinds 2000 is haen veurzitter. In die hoedanigheid is haen ok lid vân de hiël belangriéke sponsorkemissie. Âs zellefstendig ôndernemer is Jan aktief in verschillende ôndernemersvereniginge, zoëwâl in ôs keiedaörep âs regionaal.

Zoë-âs we allemaol wiëte haet Jan ok binne ôs eige karnevalsvereniging de Keieschiéters de nuuëdige aktiviteite ôntploeïd. In 1976 woord haen tot verrassing vân vól mínse oétgerope âs örste getrouwde príns vân ’t keieriék. Nao zien prínsejaor woord Jan lid vân de Raod vân Ellef. Haen haet dât 5 jaor gedaon.

Vân 1979 wies 1981 waor haen bestuurslid. Daorbeej waor haen 7 jaor lid vân de kemissie kiénderkarneval, 3 jaor lid vân de kemissie pers en propaganda (wât now krántekemissie is) en haen deej jaorelang, same mit ziene vriendegroep, mei ân d’n ôptoch.

Âs ald-prins is Jan oéteraard lid vân de OPA’s. vör dees club haet Jan 10 jaor de jaorlikse fietsdaag mei gestalte gegaeve.

Oét ál ’t baovestaonde bliek dât Jan unnen ôntzettend aktieve mán is, daen zien stiéntjes wâl beejgedrage haet ân ’t gemínschaplaeve in Ârce. Haen is iën vân de mínse wao weej grôts ôp zien, want zônder dit saort mínse zujje weej in Ârce neet hebbe wât d'r now is.

Jan… vân hârte profiesjat mit dizze Bônten Hoephap.