De vieftiende Bônten Hoephap vör Wiel Rutten

Al vör de vieftiende kiër woord d'r dit jaor door ’t bestuur vân de Keieschiéters d’n Bônten Hoephap oétgereikt. Mit de oétreiking vân dit prachtige bônte beeldje vân klei wört jaorliks unnen Ârcenaar ge-iërd en eum of eur daormit publiekelik te bedánke vör zien groëte verdinste vör ôs daörep ôp maatschappelik vlak. D'r dint dân spraoke te zien vân unne belangelozen inzet. Dit jaor veel de iër te beurt ân Wiel Rutten.

Waorum Wiel Rutten?

Wiel haet in verschillende vereniginge zien spaore ruúmschoëts verdind. Zien aktieve verenigingslaeve vaelt eigelik oétiën in drie blök.

Ôp de örste plâts kenne we Wiel natuurlik âs vorst-veurzitter vân ôs karnevalsvereniging. In 1970 woord haen lid. In 1972 kwaom haen beej ’t bestuur en in 1974 woord haen vorst-veurzitter. ’n Funksie die haen mâr lifs 17 jaor vervulde. In dizzen tiéd haet haen zich ôp völ maniére biezônder ingezatte. Um mâr is wât ôp te neume:

in 1978 organisator vân de wielerzaésdaagse vör de uniforme vör de Raod vân Ellef ;

in 1978 woorde d'r vör ’t örs schlagers ôp kassette gezatte en in 1983 kwaom d'r ’n LP oét;

't 3x11 jaörig bestaon in 1983 waor ’n högtepúnt vör Wiel mit âs klap ôp de veurpiél de fantastische revue in ’t naojaor vân 1984;

in 1977 woord ônder de bezielende leiding vân Wiel de resepsie vör de jeugdpríns ingevoerd;

Wiel haet mit de vastenaovend ok áltiéd de link gelág mit d’n ándere kánt vân de medalie: aandach vör de mínse die ’t neet zoé good hebbe. Beej de örste Karnevalsmis in 1987 woord mit de kollekte begoos vör zuster Redempta;

tiédes ’t vorst-veurzitterschap vân Wiel zien ok de vlage ingevoerd.

Um kort te zien, Wiel waor jaore lang unnen hiël inspirerende veurzitter, waorân de karnevalsvereniging biezônder völ te dánken haet.

’t Twedde blok begoos in 1995. Wiel woord toen veurzitter vân de jubileumkemissie vân RKDEV. Dees vereniging bestônd 75 jaor en vônd Wiel, ôndanks de ziekte vân zien vrouw Truus, bereid um dees klus ôp zich te neme. Ônder zien bezielende leiding woorden d'r völ aktiviteite vör de tiéms, unne zaéskamp vör ’t gánse daörep en ’n groët daörepsfiës georganiseerd.

In 1997 begint Wiel ân ’t derde blok. Wiel woord veurzitter vân de Keuninklikke Hermenie. Vör die vereniging stônd ôp dât momént 't 150-jaörig jubileum vör de deur. Dit fiës woord in 2001 groëts gevierd mit o.a. ’n prachtig proms-konsert.

Behalleve dât haen völ waerik vör dees drie groëte vereniginge haet verzatte, haet Wiel ok nag ándere verdinste gehad. Haen waor 11 jaor leider beej de wandeltochte vân ’t KVW. Haen haet jaorelang de kersstál in de kaerik gebouwd. Haen haet ’t betônne “staketsel” vân de kaerikklok gemâkt. Haen waor aktief tegge de gemíntelikke herindiëling mit Venlo. Haen waor kootsj vân ’n jeugdtiém vân AV Flash. Tenslotte stelt haen belangloos ziene vrachwage beschikbaar vör diverze vereniginge.

Oét ál dit baovestaonde bliek dât Wiel unnen ôntzettend aktieve míns is, daen zien stiëntje miër dân beejgedrage haet ân ’t gemínschapslaeve in Ârce. Haen is iën vân die mínse waor weej gröts ôp kunne zien, want zônder dit saort mínse zujje we in Ârce neet hebbe wât d'r now is.

Wiel…vân hârte profiesjat mit dizze Bônten Hoephap.