De zivventiende Bônten Hoephap vör Hans Coenders

Al vör de zivventiende kiër wört dit jaor door ’t bestuur vân De Keieschiéters d’n Bônten Hoephap oétgereikt. Mit de oétreiking vân dit prachtige beeldje wört jaorliks unnen Ârcenaar ge-iërd um eum of eur daormit publiekelik te bedánke vör zien groëte verdinste vör ôs daörep ôp maatschappelik vlak. D'r dint dân spraoke te zien vân unne belangelozen inzet. Dit jaor veel de iër te beurt ân Hans Coenders.

Waorum Hans Coenders?

Hans haet zien spaore in ’t verenigings- en maatschappelikke laeve miër dân ruúm verdind.

Haen haet zien kwaliteite ôp völ gebiede ten dinste gesteld ân ôs Ârcese gemínschap. Zônder kompleet te zien neume we d'r ’n paar ôp.

Ôp de örste plâts kenne we Hans natuurlik âs unnen echte karnevallist. Haen waor príns in 1990. In 1992 weerd haen vorst vân de vereniging. Dit woord in 1995 áfgeslaote. Sinds dât jaor is haen lid vân de kemissie kránt. Haen waor 23 jaor lid vân de Joekskemissie en ôp ’t momént is haen ok nag lid vân de, vör dit jubileumjaor extra in ’t laeve gerope, PR-kemissie. Haen is al verschillende jaor lid vân de muziekkemissie die ellik jaor de CD verzörrigd. Daorbeej is haen zellef ok aktief âs schriéver vân karnevalsslagers en waor haen de driévende krach achter d’n dánsgroep “Grand Prestige”. Ok waor haen mitôpreechter vân de karnevalsgroep Zônder Naam en mit-inisjiator vân ’t schitterende veurwaerik dât jaorelang âs áfsloéting vân de karneval woord geprissenteerd. Vör ál dees verdinste woord haen al iërder benump tot lid vân verdinste vân ôs vereniging. Nevve de karnevalsvereniging haet Hans ôp völ ándere gebiede zien kwaliteite ingezatte. Zoë waor haen lid vân Jông Ârce. Haen waor lid vân ’t Roëje Kruús, waorônder drie jaor veurzitter vân de jeugáfdiëling. In daen tiéd woord d'r ân völ internasjionale wedstrijde mei gedaon. Hans waor ok jaorelang lid vân de jông Gild. Binne dees vereniging waor haen ôndermiër keuningsknaech en 2^e gildemeister (sikkretaris).

Hans haet ok zoë ziene sportieve kánt…. Haen waor meiôpreechter vân voetbalklub FC ’t Pleintje en 15 jaor veurzitter vân dees klub.

Tenslotte haet Hans ok m.b.t. ôs basisschoël ruúm zien spaore verdind. Haen waor 7 jaor veurzitter vân de oudervereniging en zoot 5 jaor in de medezeggenschapsraod. Vör zien groëte verdinste vör de Ârcese gemínschap woord Hans al iërder de spéld vân verdinste vân de Gemínte Ârce en Vélde oétgereikt.

Oét ál ’t baovestaonde bliek dât Hans unne ôntzettend aktieve mins is, daen zien stiëntje miër dân beejgedrage haet ân ’t gemínschapslaeve in Ârce. Haen is iën vân die mínse waorôp weej gröts kunne zien, want zônder dit saort mínse zujje wej in Ârce neet hebbe wât d'r nów is.

Hans…. vân hârte profiesjat mit dizze Bônten Hoephap.