D´n achtiende Bônten Hoephap vör Annie Onckels

Al vör d’n achtiende kiër woord dit jaor door ’t bestuur vân de Keieschiéters d’n Bônten Hoephap oétgereikt. Mit de oétreiking vân dit prachtige beeldje wört jaorliks unnen Ârcenaar ge-iërd um eum of eur daormit publiekelik te bedánke vör zien groëte verdinste vör ôs daörep ôp maatschappelik vlak. D'r dint dân spraoke te zien vân unne belangelozen inzet. Dit jaor veel de iër te beurt ân Annie Onckels.

Waorum Annie Onckels?

Annie haet eur spaore in ’t verenigings- en maatschappelik laeve miër âs zât verdind. Zeej haet eur kwaliteite ôp allerlei gebied ten dinste gesteld vân ôs Ârcese geminschap.

Zônder kompleet te zien neume we d'r ’n paar ôp.

Ôp de örste plâts is Annie al 43 jaor lid vân de Gemengde Zangvereniging. Zeve jaor haet ze in ’t bestuur gezaete âs sikkretaresse. Ze haet 1 jaor kleuterschoël gedaon in de blokhut. Ok waor ze laesmooder ôp schoël. Ze waor mei ôprichster vân Veilig Verkiër Nederland. Vör dees vereniging zoot ze 15 jaor in ’t bestuur. Annie zoot vervolges 4 jaor in ’t bestuur vân stichting Geminschapshoés. Ok waor ze 5 jaor bestuurslid vân d’n Vrouwenbônd. Verder haet ze 13 jaor lang parochiewaerik gedaon. Nag steeds (al 15 jaor) bringt ze de kwartaalberichte vân de parochie rônd. Ok waor ze lid vân de kemissie Roéte Troéf en Klokke Drie.

Vör de Keieschiéters zoot Annie 4 jaor in de zaalkemissie en 11 jaor lang ging ze âs koërlid mei vör ’t ôpneme vân de karnevalsslagers. In de laeste revue hâj ze mâr ’n kleine rol, mâr vör alle revues zörrigde ze vör de kliër. Ok vör de Alde Gild haet ze de kliër verzörrigd beej eur 350-jaörig bestaonsfiës. Annie haet ok meigewaerikt ân diverze kollektes. 10 Jaor lang leep ze vör de kankerbestrijding, hârtstichting en gehendikepten. Daorbeej waor ze 4 jaor lid vân de Ârcese haölepdins. Beej völ ivveneménte waor ze aanwezig âs EHBO-ster.

Ok ân ’t Kiéndervakánsiewaerik haet Annie jaorelang beejgedrage âs leidster beej völ ivveneménte.

Ôp dit momént is Annie nag steeds aktief. Ze zit vör de KBO in de kemissie die 't 45-jaörig jubileum organizeert. Verder mâkt ze kliër die kepot zien vör de mínse die ônder begeleiding woëne in Ârce. Ok is ze nag aktief âs verkoëpster ôp de jaorlikse vloëiemaert.

Oét ál dit baovestaonde bliek dât Annie ’n ôntzettend aktieve vrouw is, die eur stiëntje wâl haet beejgedrage ân ’t geminschapslaeve in Ârce. Ze is iën vân die mínse waor weej gröts ôp kunne zien, want zönder dit saort mínse zujje we in Ârce neet hebbe wât d'r nów is.

Annie…..van hârte profiesjat mit dizze Bônten Hoephap.