D’n twintigsten Bônten Hoephap vör Mieke Schuurmans

Al vör d'n twintigste kiër woord dit jaor door ’t bestuur vân De Keieschieters d’n Bônten Hoephap oétgereikt. Mit de oétreiking vân dit prachtige bônte beeldje vân klei wört jaorliks unnen Ârcenaar ge-iërd um eum of eur daormit publiekelik te bedánke vör zien groëte verdinste vör ôs daörep ôp maatschappelik vlak. D'r dint dân spraoke te zien vân unne belangelozen inzet. Dit jaor veel de iër te beurt ân Mieke Schuurmans

Waorum Mieke Schuurmans?

Mieke haet eur spaore in ’t verenigings- en maatschappelik laeve miër âs ruúm verdind. Ze haet jaorelang eur kwaliteite ôp allerlei gebied in dins gesteld vân ôs Ârcese gemínschap. Zônder kompleet te zien neume we d'r ’n paar ôp:

In 1966 kwaom Mieke vanoét Lômm naor Ârce woëne. Zeej waor toen directrice vân de huishoudschoël in Lômm. Ze haet zoë völ Ârcese megjes ônder eur hoede gehad. Daorbeej haet Mieke verschillende vreejwilligersfunksies vervuld. Zoë waor ze 5 jaor bestuurslid vân ’t Roëje Kruús en waor ze veurzitter vân de oudervereniging vân de basisschoël in Ârce. Ze waor ok veurzitter vân Veilig Verkiër Nederland, afdiëling Ârce. Vân 1982 wies 1988 waor ze sikkretaris vân de Stichting Gemínschapshoés Ârce en vân 1987 wies 1993 waor ze sikkretaris vân de aopenbare Bieblioteek vân Ârce.

Vör de Limburgse Vrouwevereniging haet Mieke völ jaore lang kurzusse gegaeve en in de jaore Sivventig haet ze verschillende kaokkurzusse gegaeve ân de verkenners.

Jaorelang waor Mieke aktief in ’t kader vân de maaltiédverziening vör aldere. Ok waor ze veurzitter vân de Katholieke Bónd vân Aldere. In dât kader haet ze ok verschillende veurlichtingsbeejiënkômste verzörrigd. Tot slot waor ze lid vân de seniorenraod Ârce-Lômm- Vélde.

Dees lies aoverkiékend, keus-se neet ánders dân konkludere dât Mieke ziech völ oore en aovende in dins haet gesteld vân ’t verenigingslaeve in ôs daörep.

Oét ál dit baovestaonde bliek dât Mieke ’n ôntzettend aktieve vrouw is die eur stiëntje miër âs beejgedrage haet ân ’t Gemínschapslaeve in Ârce. Ze is iën vân die mínse waor weej gröts ôp kunne zien, want zônder dit saort mínse zujje we in Ârce neet hebbe wât d'r nów is.

Mieke, vân hârte profiesjat mit dizzen Bônten Hoephap.

Nao de oétreiking vân d’n Bônten Hoephap en ’n wâlverdind lang zal ze laeve vân de zaal deej Mieke nag unnen ôproop ân iederiën um toch mâr zoëvöl meugelik ân vreejwilligerswaerik te doon. D'r zien völ mínse nuuëdig. Dizzen ôproop kunne weej vân hârte öndersteune.