D'n 21^e Bônten Hoephap vör Ger Schreven

Al vör d'n 21^e kiër woord dit jaor door ’t bestuur vân de Keieschiéters d’n Bônten Hoephap oétgereikt. Mit de oétreiking vân dit prachtige bônte beeldje vân klei wört jaorliks unnen Ârcenaar ge-iërd um eum of eur daormit publiekelik te bedánke vör zien groëte verdinste vör ôs daörep ôp maatschappelik vlak. D'r dint dân spraoke te zien vân unne belangelozen inzet. Dit jaor veel de iër te beurt ân Ger Schreven.

Waorum Ger Schreven?

Ger haet zien spaore in ’t verenigings en maatschappelikke laeve ruúm verdind. Haen haet jaorelang zien kwaliteite ôp allerlei gebied ten dinste gesteld vân ôs Ârcese gemínschap. Zônder kompleet te zien neume we d'r ’n paar ôp.

Vör de Jông Gild, ofwâl ’t St. Petrus en Paulusgilde, waor Ger in zien jônge jaore kapitein.

Toen ’t Gild in 2006 eur 300-jaôrig bestaon vierde waor haen mei-organizator vân ’t jubileumfiës. Ok waor haen de penningmeister vân de stichting Vrienden St. Petrus en Paulusgilde.

Vân de Alde Gild waor Ger keuning en waor haen lid vân ’t organizasiekommité vân ’t jubileumfiës.

Vân ôs eige karnevalsvereniging is haen 43 jaor lid, mit un ruúme staot vân dins, zoë-âs 20 jaor techniese kemissie, waorvân 7 jaor veurzitter. 11 Jaor kemissie kránt, 10 jaor penningmeister vân de Raod vân Ellef, 7 jaor bestuurslid, waorvân 4 jaor vice-veurzitter en vorst. 12 Jaor veurzitter vân de kliërkemissie en mâr lifs 32 jaor lid vân de Raod vân Ellef.

Ger waor ok 10 jaor veurzitter vân ’t KiénderVakánsieWaerik en haen waor penningmeister vân de trimklup. Vân de Ôndernemersvereniging Ârce, Lômm, de OVAL, waor Ger 4 jaor bestuurslid en 8 jaor veurzitter.

Zinge is iën vân zien passies. Haen is al vânáf 1989 lid vân mannekoër Arch Luit. Vân dees vereniging waor haen o.a. penningmeister en is haen nów de veurzitter.

Ok boéte ’t verenigingslaeve is Ger hiël aktief gewès. We kunne neume: koördinator sakraméntsprosessie, lid vân verschillende gemíntelikke kemissies, 8 jaor vreejwilliger beej de bánk en mit ’t hoëgwater in jannewarie 1995 mit verantwaordelik vör de ketering vân de völ hoëgwaterbestrijders.

De baovegenumde lies aoverkiékend, keus-se neet ánders dân konkludére, dât Ger zieg völ aovende en oore in dins haet gesteld vân ’t verenigings- en maatschappelikke laeve in ôs daörep.

Oét ál dit baovestaonde bliek dât Ger unne ôntzettend aktieve man is die zien stiëntje miër âs beejgedrage haet ân ’t Gemínschapslaeve in Ârce. Haen is iën vân die mínse waor weej gröts ôp kunne zien, want zônder dit saort mínse zujje we in Ârce neet hebbe wât d'r nów is.

Ger….van hârte profiesjat met dizzen Bônten Hoephap.

Nao de oétreiking vân d’n Bônten Hoephap en ’n wâlverdind applaus deej Ger nag ’n kort dankwördje ân de zaal.