D'n 22^e Bônten Hoephap vör Henk Rheiter

Al vör d'n 22^e kiër woord dit jaor door ’t bestuur vân de Keieschiéters d’n Bônten Hoephap oétgereikt. Mit de oétreiking vân dit prachtige bônte beeldje wört jaorliks unnen ârcenaar ge-iërd um eum of eur publiekelik te bedánke vör zien groëte verdinste vör ôs daörep ôp maatschappelik vlak. D'r dint dân spraoke te zien vân unne belangelozen inzet. Dit jaor veel de iër te beurt ân Henk Rheiter

Waorum Henk Rheiter?

Henk haet zien spaore in ’t verenigings- en maarschappelikke laeve ruúm verdind. Haen haet jaorelang zien kwaliteite ôp hiël völ gebiede ten dinste gesteld vân ôs Ârcese geminschap. Vör bijna alle vereniginge haet haen wâl iets gedaon. Zônder kompleet te zien neume we d'r ’n paar ôp.

De belangriekste verdinste zien in 4 groepe te verdiële, te wiëte: volleybalvereniging AV Flash, de schoël, ’t Sintermerteskommitee en de karnevalsvereniging.

Beej AV Flash waor Henk 11 jaor veurzitter vân de rekreasiekemissie, 6 jaor bestuurslid, mei-organizator vân ’t jeugdkamp, spiéker beej de toernooje, lid vân de jubileumkemissie en kootsch vân de jeugd.

Vân ’t Sintermerteskommitee waor Henk 8 jaor veurzitter.

Mit betreking tot de schoël waor haen 10 jaor lid vân de oudervereniging, waorvân 5 jaor sikkretaris en 5 jaor veurzitter. Daorbeej waor haen ok nag lid vân de verkiërskemissie.

Vör de Keieschiéters waor Henk vânáf 2002 wies nów zänger. In 2000 zoot haen in de jubileumkemissie. Verder waor haen hoofdrolspeuler in de revue en is haen al 16 jaor lid vân de joekskemissie. Al vânáf 1994 is haen de prissentator vân de jeugdzittinge. Haen waor vorst en in 2008 Príns. Daornao is haen 3 jaor lid vân de Raod vân Ellef. Boéte Ârce is Henk beej ziene waerikgaever Daelzicht, behalleve beroepsmaotig, ok nag âs vreejwilliger aktief. Haen is mei-organizator vân jeugdaktiviteite.

Vör ôs voetbaltrots RKDEV waor Henk aktief in ’t jubileumkommitee. Daornaeve waor haen prissentator beej völ aktiviteite, ok vân ándere vereniginge.

In 1995 waor haen betrokke beej de organizasie en deej haen de prissentasie vân ’t hoëgwaterkonsert.

De baovegenumde lies aoverkiékend, keus-se neet anders dân konkludere dât Henk ziech völ aovende en oore in dins haet gesteld vân ’t verenigings- en maarschappelikke laeve in ôs daörep.

Heeroét bliek dât Henk unne ôntzettend aktieve mán is daen zien stiëntje miër âs beejgedrage haet ân ’t Gemínschapslaeve in Ârce. Haen is iën vân die mínse waor weej gröts ôp kunne zien, want zônder dit saort mínse zujje we in Ârce neet hebbe wât d'r nów is.

Henk, vân hârte profisjat mit dizzen Bônten Hoephap .

Nao de oétreiking vân den Bônten Hoephap en ’n verdind applaus deej Henk nag ’n kort dánkwördje ân de zaal.