D'n 23^e Bônten Hoephap vör John Hegger

Al vör d'n 23^e kiër woord dit jaor door ’t bestuur vân de Keieschiéters d’n Bônten Hoephap oétgereikt. Mit de oétreiking vân dit prachtige bônte beeldje wört jaorliks unnen Ârcenaar ge-iërd um eum of eur publiekelik te bedánke vör zien groëte verdinste vör ôs daörep ôp maatschappelik vlak. D'r dint dân spraoke te zien vân unne belangelozen inzet. Dit jaor veel de iër te beurt ân John Hegger

Waorum John Hegger?

John haet zien spaore in ’t verenigings- en maatschappelik laeve miër dân ruumschoëts verdind. Haen haet jaorelang zien kwaliteite ôp hiël völ gebiede ten dinste gesteld ân ôs Ârcese geminschap en deut dât nag steeds. Zônder kompleet te zien neume we d'r ’n paar ôp.

Beginne we beej de oudervereniging vân de schoël. Heej waor John vânáf 2002 penningmeister.

Beej ôs voetbalklub DEV hâj John verschillende funksies. Haen waor jeugdleider, jeugdtraéner en grensrechter. Haen waor sikkretaris vân ’t jeugdbestuur en haen waor betrokke beej d’n ôpzet vân de DEV-daag. Vânáf 2007 is haen lid vân ’t hoofdbestuur.

Vör ôs eige Karnevalsvereniging "de Keieschiéters" waor John 9 jaor bestuurslid, waorvan 2 jaor twedde sikkretaris en 7 jaor örste sikkretaris. ’n Zwaore taak. Verder waor haen lid vân de horeka-kemissie en betrokke beej de organizasie vân de promskonserte. Nevve baovegenumde funksies is John duk te zeen gewès âs vreejwilliger beej aktiviteite vân ’t KiénderVakánsieWaerik en is haen mit regelmaot in LLTB-verbánd aktief vör ôs agrariërs. In 2008 haet haen nag ’n moeëj projekt mit geregeld: “boerderije in ’t leech”. De baovegenumde lies aoverkiékend keus-se neet ánders dân konkludere dât John zich völ aovende en oore in dins haet gesteld vân ’t verenigings- en maatschappelikke laeve in ôs daörep.

Oét al ’t baovestaonde bliek dât John unnen ôntzettend aktieve mán is, daen zien stiëntje miër dân beejgedrage haet ân ’t geminschapslaeve in Ârce. Haen is iën vân die mínse waor weej gröts ôp kunne zien, want zônder dit saort mínse zujje weej in Ârce neet hebbe wât d'r nów is.

John…. Vân hârte profiesjat mit dizzen Bônten Hoephap.

Nao de oétreiking vân d’n Bônten Hoephap en ’n wâlverdind applaus deej John nag ’n kort wördje ân de zaal. Haen vertelt dât haen mit zien pas 46 jaor hiël veriërd is mit dees ônderschei-jing. Haen dánkt iederiën waormit haen ál die jaore haet kunne samewaerike, vörál ok die mínse die áchter de schaerme waerike.