De 25^e Bônten Hoephap vör Toon Drissen

Al vör de 25^e kier woord dit jaor door ’t bestuur vân de Keieschiéters d'n Bônten Hoephap oétgereikt. Mit de oétreiking vân dit prachtig bônte beeldje wört jaorliks unnen Ârcenaar ge-iërd um eum of eur daormei publiekelik te bedánke vör zien groëte verdinste vör ôs daörep ôp maatschappelik vlak. D'r dint dân spraoke te zien vân unne balangelozen inzet. Vör d’n twedde kiër woord de bekendmaking vân d'n oétverkaorende via ’n paar “afval”vraoge in de zaal geregeld. Heejoét kwaom Toon Drissen oéteindelik nao veure.

Waorum Toon Drissen?

Toon haet zien spaore in ’t verenigings en maatschappelik laeve miër dân ruum verdind. Haen haet jaorelang, wies ôp d’n daag vân vândaag zien kwaliteite ôp allerlei gebied ten dinste gesteld vân ôs Ârcese gemínschap. Zônder kompleet te zien neume we d'r ’n paar ôp. Beginne we mit ôs voetbaltrots DEV. Toon waor vör dees vereniging o.a. 20 jaor jeugdleider, leider vân de Dames 2, lid vân ’t hoofdbestuur, lid vân ’t jeugdbestuur en sponsorkemissie, âs ok ôprichter en veurzitter vân d’n DEV-daag. Vör de verdinste vör die vereniging woord Toon al iërder benump tot iérelid en ônderscheije mit ’n zilvere KNVB spéld.

Vör de Tennisclub Arcen is Toon vreejwilliger.

In ôs eigen Karnevalsvereniging "de Keieschiéters" haet Toon unnen hiële lange staot vân dins. ’t Begoos allemaol mit zien prinsschap in 1978. Daornao 16 jaor lid vân de Raod vân Ellef. Vân 1999 wies 2006 waor haen veurzitter vân ôs vereniging. Daorbeej waor en is haen al jaorelang aktief in miërdere kemissies, zoë-âs de kemissie Krant, de ôptochkemissie, de kemissie Hoéshaldelik Riggelemént, de Technische Kemissie zaal en de Horecakemissie. Vör dees gánse lies ân verdinste woord Toon al benump tot Iérelid vân Verdinste.

Ôp maatschappelik gebied is Toon al vânáf 1999 lid vân de Geminteraod. Örs 10 jaor vör de Geminte Ârce en Velde en nów vör de geminte Venlo. Vânoét dees funksie is Toon áltiéd aktief gewès vör völ vereniginge, vörál in Ârce. Daornaeve ôndersteund haen gaer vreejwilligers in de zörrig. Ok haet haen ziech biezônder ingezatte vör de realizering vân ’t ni-je MFA in Ârce en de verni-jing vân ’t sportpark vân DEV.

Daornaeve zet haen zich biezônder in vör inisjatieve en ôntwikkelinge ôp toeristies-rekreatief gebied. Zoë is haen veurzitter vân Toeristische Informatievoorziening Arcen (TIVA), die ok ’t vootvaer Ârce hebbe gerealizeerd. Ok is haen bestuurslid vân ’t Toeristisch Platform Maasduinen – Liefde voor Limburg. Mit ál dees inisjatieve drug haen völ beej ân de ekonomiese ôntwikkeling vân ôs prachtige Maasdaörep.

De baovegenumde lies aoverkiékend, keus-se neet ánders dân konkludére dât Toon ziech völ aovende en oore in dins haet gesteld vân ’t verenigings en maatschappelik laeve in ôs daörep. ’t Is neet vör niks dât haen heejveur ok al keuninklik is ônderschei-je.

Oét ál ’t baovestaonde bliek dât Toon unne ôntzettend aktieve míns is, daen zien stiëntje miër dân beejgedrage haet ân ’t geminschapslaeve in Ârce. Haen is iën vân die mínse waor weej gröts ôp kunne zien, want zônder dit saort mínse zujje we in Ârce neet hebbe wât d'r nów is.

Toon….. vân hârte profiesjat mit dizze Bônten Hoephap.