De 26^e Bônten Hoephap vör Wim Janssen

Al vör de 26^e kier woord dit jaor door ’t bestuur vân de Keieschiéters d'n Bônten Hoephap oétgereikt. Mit de oétreiking vân dit prachtig bônte beeldje wört jaorliks unnen Ârcenaar ge-iërd um eum of eur daormei publiekelik te bedánke vör zien groëte verdinste vör ôs daörep ôp maatschappelik vlak. D'r dint dân spraoke te zien vân unne belangelozen inzet. Ok dit jaor waor d’n oétverkaorene neet veuráf geïnformeerd, mâr woord de bekendmaking vân d'n oétverkaorende via ’n paar “afval”vraoge in de zaal geregeld. Heej-oét kwaom Wim Janssen oéteindelik nao veure. Dit waor ok vör Wim ’n verrassing.

Waorum Wim Janssen?

Wim haet zien spaore in ’t verenigings- en maatschappelik laeve miër dân ruum verdind. Haen haet jaorelang, wies ôp d’n daag vân vândaag zien kwaliteite ôp allerlei gebied ten dinste gesteld vân ôs Ârcese gemínschap. Zônder kompleet te zien neume we d'r ’n paar ôp. Beginne we mit zien aktiviteite vör ’t Franz Pfannerhoés ôp Klein Vink in Ârce. Ôp dit momént is Wim heej vân de sikkretaris, lid vân de PR-, de tentoënstellings- en de konsertkemissie. In 2009 waor Wim mit verantwaordelik vör de organizasie vân de tentoënstelling in ôs prachtige kestiël.

Zien karriëre mit betrekking tot de organizasie vân fiëste begoos in 1973 mit de organizasie vân ’n daörepsfiës ôp de Maert ter gelaegenheid vân 25 jaor keuningin Juliana. Daornao volligden ’n aantal weifiëste waorvân haen d’n belangriékste mán waor. Oét de organizasie vân de weifiëste ôntstônd de Stichting: Vân Ârce vör Ârce, mit völ aktiviteite waorônder d’n aanleg vân unnen örste speultuin in Ârce ôp de plek waor nów de schoël ân d’n Borewaeg stiët.

Wim waor mei-inisjatiefnemer vân “Rônd um de Pômp”. Dizze groep prissenteerde ziech jaorelang ôp zittinge mit ôptraejes en mit prachtige groepe en wages in d’n ôptoch. Ok ôp muzikaal gebied haet Wim ’t nuuëdige beteikend. Völ karnevalsschlagers woorden door eum geschreve en duk ok gezônge. Mennige schlager wört nag steeds ten gehure gebraoch. Waen herinnert ziech neet: ‘’t Snuupke vân de waek”?

Wim haet ok mit zörrig gedrage vör de talloze muziekôpnames ôp cassette, single, LP en CD vânáf de 70er jaore.

Vân ôs eige Karnevalsvereniging "de Keieschiéters" is Wim al 41 jaor lid. Heej-in is haen lid gewès vân diverze kemissies: kienkemissie 3 jaor, Joekskemissie 9 jaor, waorvân 2 jaor âs veurzitter, Muziekkemissie. En nów alwèr 6 jaor vân "Laot oow us huúre" /Ouverture/Joekskemissie. Ten slotte waor Wim in d’n tiéd vân unne krisis binne de vereniging lid vân de kemissie vân gôje dinste.

De baovegenumde lies aoverkiékend, keus-se neet ánders dân konkludére dât Wim ziech völ aovende en oore in dins haet gesteld vân ’t verenigings- en maatschappelik laeve in ôs daörep.

Oét ál ’t baovestaonde bliek dât Wim unnen ôntzettend aktieve míns is, daen zien stiëntje miër dân beejgedrage haet ân ’t geminschapslaeve in Ârce. Haen is iën vân die mínse waor weej gröts ôp kunne zien, want zônder dit saort mínse zujje we in Ârce neet hebbe wât d'r nów is.

Wim….. vân hârte profiesjat mit dizzen diek en diek verdinde Bônten Hoephap.

Wim hâj ’n korte reaksie: “Ik heb d'r gen waörd veur”!