De 27 ^e Bônten Hoephap vör Pierre Hegger

Dit jaor woord d’n Bônten Hoephap alwèr vör de 27^e kiër door de vereniging oétgereikt. Mit de oétreiking vân dit prachtig bônte beeldje wört jaorliks unnen Ârcenaar bedánkt vör zien groëte verdinste.

Ok dit jaor waor de mán of vrouw neet veuráf geïnformeerd, mâr woord de bekendmaking vân d’n oétverkaorene via ’n paar “afval”-vraoge in de zaal geregeld.

Heej-oét kwaom Pierre Hegger oéteindelik bliej verrast nao veure. Vör Pierre en zien vrouw Annie ‘n groëte verrassing.

Waorum Pierre Hegger?

Ôndanks dât Pierre mit zien gezin jaore in Den Bosch haet gewoënd vör zien waerik o.a âs meiwaeriker beej ’t archief vân de provinsie Braobant, haet Pierre zien spaore in ’t verenigings- en maatschappelik laeve in Ârce miër dân verdind. Woej Pierre ân ’t waerik ging beej de Geminte Venlo kwaom haen wer trug nao zien gebaorteplâts. Pierre woos vör iederiën daen ’n beroep ôp eum deej feillos de waeg te vínde in ’t archief vân de geminte Venlo. ’t Ôpstelle vân statute deej Pierre al in vroeger jaore. Wie de KVP aoverging nao ’t CDA, waor Pierre âs bestuurlid betrokke beej de ôprichting. Dees ôpgedaone kennis kwaom vân pas wie de Zjeu de boel klub ôpgereech moos waere. Vân dees klub is Pierre 8 jaor veurzitter gewès en nów nag trouw lid.

Door de passie vor ’t verleeje is Pierre ’n paar jaor lid gewès vân ’t bestuur vân de stichting Heemkunde, waor haen wies ôp d’n daag vân vândaag nag vreejwilliger vân is.

Binne ôs eige vereniging haet Pierre ok unne groëte staot vân dins en is daorveur ok ônderschie-je âs Iérelid vân Verdinste. Wies nów 31 jaor lid vân ôs vereniging. Haen waor 7 jaor veurzitter vân de Kiénderkarneval. Alles beejiën is Pierre 15 jaor âs bestuurslid aktief gewès: 9 jaor twedde sikkretaris, 1 jaor örste sikkretaris en 5 jaor veurzitter. Boéte lid vân ’t geüniformiërde gediëlte waor haen ok prissentator vân ôs kiénderzitting en artiest ôp de groëte zitting.

In vroeger jaore is haen lid gewès vân ’t bestuur vân ’t Roeëje Kruús en vân ’t schoëlbestuur (in de jaore 80). Nao zien pensionering is Pierre nag áltiéd aktief gebleve. Boéte zien lidmaotschap vân de kluskemissie vân DEV (bijna 50 jaor lid vân DEV), vreejwilliger beej de Heemkunde. Pierre verzörrigd regelmaotig rôndleidinge door ôs prachtige daörep vör ’t VVV. Ok is haen al 12 jaor penningmeister beej de buurtvereniging Malibaan/Laermaert.

En toch waerikt Pierre ’t lifs ôp d’n áchtergrônd. Zoé stiët haen klaor vör de kranke en aldere die haen nao ’t Zieketriduüm rijdt. Ok ônderhilt haen verschillende haöf vör mínse die dât zellef neet miër kunne.

Beej de oétreiking vân d’n Bônten Hoephap haet Pierre de beneuming mit ôpgedrage ân alle mántelzörrigers binne ôs Gemínt. De “stille” waerikers binne ôs maatschappeej, waorveur dánk.

Pierre…vân hârte profiesjat mit dizzen Bônten Hoephap.