De 29 ^e Bônten Hoephap vör Harry Imming

Dit jaor woord d’n Bônten Hoephap alwèr vör de 29^e kiër door ’t bestuur vân Karnevalsvereniging "de Keieschiéters" Ârce oétgereikt. Mit de oétreiking vân dit prachtig bônte beeldje wört jaorliks unnen Ârcenaar ge-iërd um eum of eur daormei publiekelik te bedánke vör zien groëte verdinste vör ôs daörep ôp maatschappelik vlak. Dit jaor ging d’n Bônten Hoephap naor d’n hiër Harry Imming.

Harry stiët same mit zien vrouw José midde in ’t laeve en daormei midde in ôs gemínschap. Iederiën kent Harry natuurlik vân ôs eige Karnevalsvereniging, waor haen 11 jaor âs vorst veurôp is gegaon. Príns gewès in ’t jaor 1998 en daornao toegetraoje tot ’t dageliks bestuur. Vânáf 1999 haet haen zitting gehad in de kemissie die de zittinge organizeert. Nao zienen tiéd âs vorst woord d'r oéteraard al gauw örges ánders ’n beroep ôp eum gedaon. Zoë prissenteert haen “Zing mei vân Ârce en de kei” en ’t áfgeloëpe jaor ’t wielerivvenemént.

Mâr neet alliën de Karnevalsvereniging meug ’n beroep ôp Harry doon. Zoë is Harry ok hiël aktief beej de gael-greune, ôs eige voetbalklub DEV Ârce. In totaal is haen 10 jaor aktief gewès âs leider beej verschillende elleftalle, waorônder jeugd elleftalle, dames 2 en ’t örs. Zoëwâl ôp âs boéte ’t vaeld is Harry aktief. Al 2 X 11 jaor âs scheidrechter waor haen mennig brándje blust mit ziene vlotten babbel. Dae vlotten babbel kúmp eum ok good vân pas beej de prissentasie vân de dinsteveiling en 't 35+ toernooi.

De kleure gael en blauw kwaome we ok al taege in zien jôngere jaore beej Jông Ârce. Daor is Harry nao zien lidmaatschap en ’n periode âs stam (waor haen biezôndere herinneringe ân haet) toegetraoje tot de staf. Binne Jông Ârce is haen betrokke gewès beej de verni-jing vân de vereniging mit ’t toelaote vân megjes beej de vereniging en de realizasie vân de ni-j blokhut.

Ôp dit momént is Harry âs bestuurslid vân ’t MFA d’n bíndende faktor vör ôs ni-je multifunksionele akkemedasie.

Has ônmeugelik um volledig te zien; want zoë is Harry ok nag belangeloos aktief gewès vör Funpop, Scrooge en völ ándere die ’n beroep ôp eum hebbe gedaon.

Harry waor ziër veriërd, mâr ok hiël verrast beej d’n ôntvangs vân dizze verdinde Bônten Hoephap.

’t Betoog vân Harry beej de in ôntvangsname vân d’n Bônten Hoephap waor völzeggend: “Vör vereniginge binne ôs kleine gemínschap is belangloos vreejwilligerswaerik vân groët belang vör ’t in stánd hálde vân de laefbaarheid binne ôs daörep. Iederiën kân ’n stiëntje beejdrage, groët of klein. Verriék mit dien beejdrage neet alliën ’n vereniging, mâr ’t verriékt ok zeker diech zellef. Dus pak diech ôp en meld diech âs vreejwilliger, beej wellike vereniging dân ok”.

Karnevalsvereniging "de Keieschiéters" Ârce is dân ok ziër veriërd d’n Bônten Hoephap oét te hebbe meuge reike ân Harry Imming.

Harry...Vân hârte profiesjat!