D’n Bônten Hoephap

't Waor dit jaor ân ôzze kersverse ni-je veurzitter de iër um de oétreiking vân d’n Bônten Hoephap te doon. D’n Bônten Hoephap wört ieder jaor door Karnevalsvereniging "de Keieschiéters" oétgereikt ân eemus of ’n organizasie daen/die ziech belangeloos haet ingezatte vör de Ârcese Gemínschap ôp allerlei vlakke. Hoephap stiët in ’t Nederlands vör hop: 'n bôntgekleurd veugelke, dât in de bös in Ârce veurkúmp. ’t Bôntgekleurde vân dit veugelke stiët simbolies vör de belangelozen inzet vân mínse vör ’t daörep Ârce en zien vereniginge. ’t Bíldje dât oétgereikt wört is weergave vân dae vogel en de simboliek daen d'r mei gepaard giët.

D’n Bônten Hoephap is dit jaor oétgereikt ân Hay en Mien Haelermans, die same jaorelang völ tiéd en enerzjie in Ârce en zien vereniginge hebbe gestaoke.

Heejônder ’n kleine ôpsomming vân wât Mien allemaol gedaon haet:

In eur jônge jaore waerikte ze al jaorelang âs vreejwillige kraamhaölep en haet mennig Arces kiénd mei ôp de werreld gehaolepe.

Ze haet ok unnen tiéd in ’t bestuur vân de zangvereniging gezaete, daor waor ze ’n paar jaor penningmeister.

Jaorelang waor ze váste vreejwilliger in de kaerik. Daor deej ze poetse en ok de kaerik vör misse en ánder gelaegenhede ôpfleure door ’t verzörrige vân de bloome, wât ze allewiels nag steeds regelmaotig deut. Dât haelepe in de kaerik waor trouwes teggen ’t piene biën vân Hay, haen koos ’t namelik neet good vínde mit de pestoër.

Mâr wât meugelik nag miër tot de verbeelding sprik is dât ze miër âs 30 jaor euren Hay, (Mien verbaetert ôs: wâl miër âs 50 jaor) mit alles haet gesteund, zoë-dât haen ál zien enerzjie en tiéd in ’t verenigingslaeve vân Ârce koos staeke. Want ’n beejdrage levere ân Ârce en vereniginge deus-se neet alliën, dât deus-se same!

Heejônder ’n kleine ôpsomming vân wât Hay allemaol gedaon haet:

Haen is 29 jaor penningmeister en/of sikkretaris gewès beej de voetbalklub. ’n Paar jaor haet haen dao ’n dubbelfunksie in vervuld. Haen is ok kemissielid gewès beej ’t terreinônderháld vân DEV. D'r wört wâl us gekschaerend gezág dât haen de hand ôp de knip haet, mâr haen haet áltiéd ten gunste vân de vereniginge ’t gaéld good bestei-jd.

Sins ’n paar jaor is haen penningmeister beej ôs KBO.

Jaorelang ’t Voetbalbál georganizeerd.

En tot slot: jaorelang waor haen de kârtrekker vân ’t áld pepeer ôphale. Iederiën daen ôpgegruid is binne DEV zal wâl us beej eum ôppe kar gestaon hebbe. Áltiéd wer ’n belaeving apârt.

Nao ’t oétreike vân d’n Bônten Hoephap noom Hay nag efkes ’t waord en waor zichtbaar aangedaon, dât nag éns aanguf dât eur hârt áltiéd nao de Ârcese vereniginge is gegaon.

Hay en Mien, names Karnevalsvereniging "de Keieschiéters" hârtelik bedánkt vör ál owen inzet.

Ârce Alaaf.