D'n 31^e Bônten Hoephap vör Wiel Reivers

D’n Bônten Hoephap, vör d'n 31^e kiër dit jaor door ’t bestuur vân de Keieschiéters oétgereikt ân eemus daen ziech belangeloos haet ingezatte vör de Ârcese Gemínschap ôp allerlei vlakke. Hoephap stiët in ’t Nederlands vör hop: 'n bôntgekleurd veugelke, dât ok in de bös vân Ârce veurkúmp. ’t Bôntgekleurde vân dit veugelke stiët simbolies vör de belangelozen inzet vân mínse vör ’t daörep Ârce en zien vereniginge. ’t Bíldje dât oétgereikt wört is 'n weergave vân dae vogel en de simboliek daen d'r mei gepaard giët.

D’n Bônten Hoephap is dit jaor oétgereikt ân Wiel Reivers.

Waorum Wiel Reivers?

Wiel haet zien spaore in ’t verenigings- en maatschappelik laeve ruumschoëts verdind. Haen haet jaorelang zien kwaliteite ôp hiël völ gebiede ten dinste gesteld ân ôs Ârcese geminschap en deut dât nag steeds. Zônder kompleet te zien neume we d'r ’n paar ôp.

Wiel is begoos beej het jôngeskoër Laus Deo, waor völ Ârcese jônges en later ok megjes beej zien gewès. Haen haet heej mennige mis, náchmis en hoëgmis gezônge. Wie haen wât alder waor ging haen jaorelang âs leider vân dit koër mei ôp kamp.

Zien kwaliteite âs leider haet haen ok kunne laote zeen beej ’t KiénderVakánsieWaerik. In daen tiéd haet haen ok nag dukker Sinterklaos gehaolepe door âs Zwarte Piet ôp te traeje beej de intochte. Nao ’n paar jaor kwaom haen in ’t bestuur vân dit KVW en haet jaorelang spelle, busreize en rômmelmaerte mei geörganiseerd. Ôp de rômmelmaert is haen nag steeds aktief âs veilingmeister. Jaorelang haet haen vör de volleybalvereniging AV Flash in de zjuriewage gezaete beej ’t volleybaltoernooi. ’n Paar jaor lang haet haen in 't bestuur vân ôs basisschoël gezaete.

Sinds 1978 is Wiel aktief beej ôs eige karnevalsvereniging. Haen begoos âs zenger vân schlagers. Later haet haen d’r ok ’n paar geschreve. Nao ’n paar jaor kwaom haen in de joekskemissie waor haen vânáf 1984 wies 2001 veurzitter vân is gewès. Vân 1994 wies 2002 waor Wiel bestuurslid vân de Karnevalsvereniging. Haen haet in alle reveus meigedaon en in de organisasie daorvân gezaete. Ge kent eum misschien nag wâl âs de veurmán in iën vân die revues. Ok haet-ie jaore in de kliërkemissie gezaete en âs veurzitter vân de muziekkemissie d'r mei vör gezörrigd dât d'r, nao ’t toet stánd kômme vân de Ârcese LP, ellik jaor ’n CD beej Jan Theelen in Munstergeleen woord ôpgenaome. Wies 2008 waor haen lid vân dees kemissie, daornao ging dit aover in de "Laot oow us huúre" kemissie. Zinge deut haen nag altiéd. Neet alliën mit vastenaovend, jaorelang âs schlagerzenger en artiest beej “Trio ôngezálte” en nów ôp zôndiggemiddig mit de vastenaovend beej: “Zing mei vân Ârce en de kei”, mâr ok beej Mannekoër “Arch Luit”, waor haen al 35 jaor lid vân is en nów in de Muziekkemissie zit. Beej de karnevalsvereniging zörrigt Wiel âs lid vân de krantekemissie cq PR-kemissie al jaore vör de vertaling vân de kránt en de adverténsies in ’t Ârces. Mennig Ârcenaar deut ’n beroep ôp eum âs haen wât in ’t Ârces vertaald wil hebbe. Same mit zien Truus verzörrigd haen al jaorelang de prissentatie vân de resepsies vân de kleine en de groëte Príns. In de zomerdaag haelept haen oét ôp ’t fietsvaerke ôp de Maas en sinds 2012 zit haen beej de heemkundevereniging in de redactie vân de Rin. Heejveur schrief haen stukke en verzörrigd d’n ôpmaak vân dât bukske.

Oét al ’t baovestaonde bliek dât Wiel unnen ôntzettend aktieve mán is, daen zien stiëntje miër dân beejgedrage haet ân ’t geminschapslaeve in Ârce. Haen is iën vân die mínse waor weej gröts ôp kunne zien, want zônder dit saort mínse zujje weej in Ârce neet hebbe wât d'r nów is.

Wiel…. Vân hârte profiesjat mit dizzen Bônten Hoephap.

Nao de oétreiking vân d’n Bônten Hoephap en ’n wâlverdind applaus haet Wiel kort en bôndig iederiën bedánkt vör de fijne samewaeriking, die meugde resulteren in dees prachtige ônderschei-jing.