D'n 32^e Bônten Hoephap vör Bèr Geurts

Al jaorelang reike we d’n Bônten Hoephap oét ân eemus binne Ârce daen völ haet beteikend vör ’t daörep en de vereniginge in Ârce. Dit hebbe we ’t vörrig jaor jaomer genôg môtte aoverslaon i.v.m. covid-19. We hebbe d'r evvel dit jaor vör gekaoze um d’n Bônten Hoephap toch oét te reike, ôndánks alle bepaerkinge. Wâl mit minder bravoér dân gewend, mâr zeker verdind en dao giët ’t um.

Weej hebbe âs bestuur unaniem beslaote dât d’n Bônten Hoephap vân dit jaor naor neemus minder giët dân Bèr Geurts. Bèr is al godwet wie lang hiël aktief binne Ârce en weej vinde dit dân ok miër dân verdind.

Bèr waor d'r âs jeugdigen tiener al vroeg beej um âs vreewilliger in zien eige daörep ân de geng te gaon. Dit waor evvel wâl in ’t verkiërde daörep, Vélde, mâr dât is eum vergaeve. Haen waor daor hiël aktief vân 1970 wies ôngevaer 1976.

Vânoét dao mâkte Bèr ’n oétstepke naor Grubbevórs, waor haen 2 kiër in de waek gymles goof ân de lokale turnklub. Dit haet haen gedaon vân 1972 t/m 1976.

Dit waor wâl neet allemaol in Ârce, mâr guf wâl aan dât Bèr unne vreejwilliger is in hârt en niere; dât meug gezág waere.

In 1987 begoos Bèr dân ok zien vreejwilligerskarrière in Ârce. Haen is toen begoos âs lid vân de medezeggenschapsraad (MR) ôp basisschoël ’t Wijdveld. Heej dooch haen mei ovver ’t reile en zeile vân de basisschoël, waor alle drie zien kiénder ok ôp zote. Daorbeej waor Bèr vânáf 1990 ok aktief beej ’t meihaelepe en organizere vân de kiénderdaag c.q. sportdaag. Bèr is ôp schoël aktief gewès t/m 1999.

Mâr dât waor nag neet genôg. Bèr vônd namelik dât haen ok bestuurlik iets binne Ârce koos beteikene en is in 1994 gemínteraodslid vân Ârce en Vélde gewaore. Haen haet in Ârce mei bestuurd t/m 1998.

Sporte zit ok beej Bèr in hârt en niere. Haen is namelik al miër dân 40 jaor lid vân DEV. Örs gestart âs fanatiek voetballer, daornao karrière gemâk vân bestuurslid toet fotograaf, vân verzörriger kliëdlokaal wies sjef dékiep vân ’t áld papeer. Bèr is binne dees vereniging ni weg te dínke. Haen is binne DEV gehuldigd in 2001 âs Lid vân Verdinste, in 2010 kreeg haen de zilvere KNVB spéld en âs kers ôp d’n taart is haen in 2019 Iérelid vân DEV gewaore. Dit allemaol vör alle dinste die haen dao haet geleverd.

In 2013 woord Bèr vreejwilliger beej de stichting Kruisen en Kapellen. Nao ’n paar mond mei te hebbe geloëpe haet Bèr ’t stökske vân veurzitter aovergenaome. Vördât haen dât stökske aovernoom loog de stichting al ’n bietje stil en haet Bèr d'r ân beej gedrage dât d'r wer laeve in de brouwereej kwaom.

Waor sommige gen hobby ân hebbe, deut Bèr gáns vreejwillig. Al jaore löp haen de Maasstraot ôp en áf en prikt dao ’t zwerfafval ôp. Haen drug zien keiestiëntje beej ân ’n schoën Ârce.

’t Is neet gáns alliën vör Ârce, mâr Bèr giët al jaore nevve de deur in Ârce um te kollektere vör verschillende gôje doele. En âs de mínse neet thoés zien, kumpt Bèr gaer unnen ándere kiër trug.

Bèr is ok betrokke beej ôs Keieschiéters âs vreejwilliger. Haen mâkt in de kemissie PR & kommunikasie al sinds 2011 de meis moeëje en bônte kiekjes vân ôs ivveneménte, die gebroekt waere beej ’t make vân ôzze fijne kránt. Ok haet haen same mit Miny ok nag ’n ándere klus binne ôs vereniging. Haen verwelkômt de mínse en verköpt de bônne tiédes verschillende ivveneménte vân de vereniging. Dit deut haen same mit Miny mit völ plezeer en dât straole ze ok áltiéd oét.

Dus nag èns: miër dân verdind!

Bèr, bedánkt vör alles en profiesjat mit ’t ôntvange vân d’n Bônten Hoephap.

Ârce Alaaf,

't Bestuur