D'n 33^e Bônten Hoephap vör John Schinck

D’n Bônten Hoephap, vör d'n 33^e kiër dit jaor door ’t bestuur vân Karnevalsvereniging "de Keieschiéters" oétgereikt ân eemus daen ziech belangeloos haet ingezatte vör de Ârcese Gemínschap ôp allerlei vlakke.

Hoephap stiët in ’t Nederlands vör hop: 'n bôntgekleurd veugelke, dât ok in de bös vân Ârce veurkúmp. ’t Bôntgekleurde vân dit veugelke stiët simbolies vör de belangelozen inzet vân mínse vör ’t daörep Ârce en zien vereniginge. ’t Bíldje dât oétgereikt wört is 'n weergave vân dae vogel en de simboliek daen d'r mei gepaard giët.

D’n Bônten Hoephap is dit jaor oétgereikt ân John Schinck.

John is al sins 2015 âs sikkretaris vân stichting Hartslag in de waer. ’n Stichting die mit eur vreejwilligers d’r vör zörrigt dât d'r in Ârce, Lômm en Vélde AED’s in elke buurt beschikbaar zien en vreejwilligers traint, die dân te haölep schete âs dât nuuëdig is. ’n Saort verzekering vör ôs allemaol dus.

John is ok aktief beej ôs eige voetbalklub D.E.V. Al 8 jaor zit haen dao in ’t bestuur en haet haen ’t sikkretariaat ôp ziech genaome. Daorveur waor haen 10 jaor aktief âs trainer beej de jeugd. Sins 2010 is John beej dees klub ok aktief âs lid vân de sponsorkemissie en haet haen d'r mei vör gezörrigd dât de klub ’n prachtig 90-jaörig en 'n 100-jaörig jubileum koos viere.

Beej ôs eige Karnevalsvereniging "de Keieschiéters" is John al vânáf 1996 lid en is haen geliek beej de kemissie kránt begoos, die later aoverging in de Stichting Steunfonds Culturele Activiteiten Arcen. Sins 2001 haet John de taak âs veurzitter vân dees kemissie ôp ziech genaome. John haet ziech ok verdinstelik gemâk in de PR-kemissie toen de vereniging 't 5 x 11 jaörig bestaon vierde.

Dit alles haet ’t bestuur vân Karnevalsvereniging "de Keieschiéters" doon besloéte ân John d’n Bônten Hoephap oét te reike. Dit jaor natuurlik wer âs ’n moeëj beeldje, mâr neet mieër vergezeld vân ’n medalie, mâr ’n moeëj spéldje, dât haen ôp de jas kân staeke.

John…vân hârte profiesjat mit dizzen Bônten Hoephap.