D'n 34^e Bônten Hoephap vör Lex van Marcke

Ônder válse veurwendsele waor haen naor MFA de Schans gelokt, mit de gedáchte dât unne gôje kennis vân eum d’n Hoephap zuj kriége. Mâr die iër veel um zellef te beurt.

Lex van Marcke kreeg dit jaor d’n Bônten Hoephap.

D’n Bônten Hoephap, vör d'n 34^e kiër door ’t bestuur vân Karnevalsvereniging "de Keieschiéters" oétgereikt ân eemus daen ziech belangeloos haet ingezatte vör de Ârcese Gemínschap ôp allerlei vlakke.

Hoephap stieët in ’t Nederlands vör hop: 'n bôntgekleurd veugelke, dât ok in de bös vân Ârce veurkúmp. ’t Bôntgekleurde vân dit veugelke stieët simbolies vör de belangelozen inzet vân mínse vör ’t daörep Ârce en zien vereniginge. ’t Beeldje dât oétgereikt wört is 'n weergave vân dae vogel en de simboliek daen d'r mei gepaard gieët.

Waorum Lex van Marcke?

Lex is aerig aktief in ’t verenigingslaeve in ôs daörep.

’t Begoos beej de Stichting Vân Ârce veur Ârce. Heejvân waor haen de penningmeister. Dees stichting haet o.a. de Weifieëste en ’n Ârcese revue georganizeerd.

Verder is Lex al 18 jaor lid vân AV Flash en haet haen 7 jaor in ’t bestuur gezaete waorvan ’n paar jaor âs veurzitter. Haen koördineerde ’t jaorliks terugkômmende boétetoernooi en waor redacteur vân ’t clubblaad.

Beej ’t hoeëg water in 1993, 1995 en 2021 waor haen koördinator vân de vreejwilligers en vanoét de daörepsraod is haen in 2022 betrokke gewès beej ’t ôpstelle vân ’n operasionele hándleiding vör hoeëgwater in Ârce.

Dân ’t Frans Pfannerhoés: Bestuurslid vanáf 2004 wies 2023 in de rol vân viceveurzitter, vicesikkretaris, vicepenningmeister, veurzitter vân de PR-kemissie en lid vân de konsertkemissie. Vânáf 2023 allieën nag âs vreejwilliger aktief.

Beej Mannekoeër Arch Luit zingt haen vânáf 2008 iéverig mei, mâr regelt ok heej de PR vör de konserten vân ’t koeër.

Vânáf 2009 is Lex bestuurslid vân de Stichting Arcens Podium die zich ten doel stelt de volkskultuur in Ârce in stand te hálde.

Beej de Tennisklub TC Arcen is Lex de toernooileider vân ’t jaorlikse KNLTB-toernooi: Brandemolen Open.

Sinds 2018 is haen beej de SMAV in funksie âs sikkretaris en behartigt de belangen vân MFA’s waorônder ok die in Ârce.

En âsof dit alles nag neet genôg is hilt Lex beej dreigend hoeëgwater âs dijkwacht de dieke in de gate en kontroleert haen ’t ônderháld en de veiligheid heejvân.

Dit alles haet ’t bestuur vân Karnevalsvereniging "de Keieschiéters" doon besloéte ân Lex d’n Bônten Hoephap oét te reike, vergezeld vân ’n spéldje vör ôp de jas.

Nao de oétreiking vân ’t beeldje, 't spéldje en blome vör Annemiek door ôzze veurzitter Lars van Oostrum, koos Lex allieën mâr de legendariese waörd vân de veurzitter vân de Keieschiéters aanhale oét de Ârcese Revue vân 1984: “Ik heb d'r gen waörd veur!”

Lex……vân hârte profiesjat mit dizzen Bônten Hoephap