D’n Bônten Hoephap stieët vör d’n hop, ’n bôntgekleurd veugelke dât in de bös vân Ârce veurkumpt. Net zô bôntgekleurd âs de mínse die d’n Bônten Hoephap in ’t verleeje hebbe gehad of in de toekôms gaon kriége. En mit bônt gekleurd bedoele we mínse die ziech vör verschillende belange vör de Ârcese geminschap hebbe ingezatte. Dit alles gáns belangeloos.

Bas, nów staon we heej âs verrassing vör diech. Neet umdâs-se moeëje pletjes keus make ôp de kompjoéter, mâr umdâs-se zonne bônt gekleurde persoeën bees. ’t Lieske is te lang um te ônthálde, daorum hebbe we ’t allemaol efkes ôp ’n reejke gezatte.

Omni vereniging

• Örs SV Arcen (2015 of 2016 mei begoos âs sikkretaris)
• Sins 2020 sikkretaris vân de Omni vereniging
  
• Mondeliks vergadering bestuursleeje
• Ovverleg mit bestuursleeje vereniginge 3 kieër in ’t jaor
• Kommunikasie ovverleg, kontakpersoeën mbt kommunikasie binne de Omni
• Mit Gonny verantwaordelik gewès vör ’t ni-je leejepakket
• Mit Joost de tiédelikke websait gemâk
  

Karnevalsvereniging "de Keieschiéters"

• Lid vân de vereniging: 12 jaor
• Lid vân de kemissie kránt
• Lid vân de PR kemissie
  
• Dieëlgenaome ân de kemissie 6 X 11
• Daorbeej ok nag beejgedrage ân ’t mei bônt kleure vân de ôptochte âs dieëlnemer
• En helaas vergaone glorie vör ôs vereniging: mâr liedjes geschreve in ’t verleeje en
  ok nag unne kieër gewônne mit Moeëje Annabel
• (Mâr zellef zinge?)
  
  

DOP: daörepsôntwikkelingsplan

• Vânoét de Omni vereniging daor aanwezig um ’t daörepsôntwikkelingsplan mbt ’t
  verenigingslaeve te vollige.
• Same mit Joost Clevis heej de websait vör gemâk.

DEV

• De websait gemâk
• Jaorelang jeugdleider gewès
• 40 jaor lid (vânáf 18 jaor áltiéd beej diverze kemissies binne DEV)
• Lid vân de PR kemissie, plus jaorliks make vân de oétgebreide oétgave jaorbukske
• Naor Denemarken ôp vakánsie gegaon en daor in de plâtselikke bieb twieë
  middige gewaerikt um dât bukske te make umdât daor Wifi waor. Vakánsiemán: Gezellig wah!
• Klubblaad gemâk
• Piet zörrigde dât de kréntjes gekopieerd woorde. Daornao woord door Jannie
  hônderde rundjes geloeëpe um de taffel um ’t blaad same te stelle.
• Ok daor bees-se aktief lid gewès, ca 18 jaor
• In ’t jeugdbestuur gezaete
• 100 jaor DEV book mei gemâk
• Áltiéd zellef gevoetbald, mâr 11 jaor geleeje gestop; dât heej nag tiéd vör waor
  

TCA

• Logo en websait gemâk mit Joost

Keuninklikke Hermenie Ârce

• 2 kieër meigehaolepe mit Top 2000. Daorin ’n Powerpoint prissentasie gemâk mit
  interessánte wieëtjes/ áchtergrônd informasie ovver de bénd/artiest/liedje.
  

Daörepskwis

• Afgeloeëpe jaor vör ’t örs mei gehaolepe mit d’n daörepskwis
  Zoeë-âs we begrepe hebbe haes-se enorm völ plezeer belèf ân de veurberei-jinge.
  

Heemkunde

• 5 jaor land d'n ôpmaak gedaon vân de Rin
• 't Logo mei gemâk

Loeëpersgroep

• Adverténsies gemâk vör de loeëpersgroep
• Adverténsies gemâk vör de Contourrun

VIA

• ’n Aantal kieër ’t bukske gemâk vör de VIA

Popkwis

• Mei organizator vân de Popkwis. ’n Hieël leuk ivvenemént dât dit jaor alwèr de 10e edisie waor

Algemeine zake

• Bospop vreejwilliger sponsorkemissie
• Beheer en dieële Sosjaal Media Keieschiéters
• Wedstriédoétslaeg Maasdaörepe. Mei ’n rees tegge de klok um alle info verzameld te kriége vör d’n dédlain
• Adverténsies ôptuige vör de Maasdaörepe

Dit is ’n gánse lies vân alles wâs-se binne Ârce allemaol haes gedaon. Dit kaós diech waekeliks ’n aantal aovende um heej ’n aktieve beejdrage ân te levere. Dit kân natuurlik neet zônder de steun vân Marisca, Amber, Luuk en Finn. Ok vör eur ’n depe buiging en völ dánk!

Mâr weej begriépe ok dât bepaalde waeke in ’t jaor diech ôp ieëne virkánte maeter vör de kompjoéter zits! Mit meziek ôp d’n áchtergrônd en unne zak borrelneutjes bees-se gáns in dien illemént.

’t Lifs bees diech áchter de schaerme aktief. Mei en dân zuút me diech ôp ’t podium,
beveurbeeld mit de popkwis. Mâr verder áltiéd ’n driévende krach áchter de schaerme.

Boéte al dees aktiviteite haes-se ok nag tiéd um trouwe supporter te zien vân dien kiénder:
Ôp zaoterdig voetballe kiéke vân Finn en âs ’t efkes luk ok naor de volleybálwedstrijde te gaon kiéke vân Amber in Maastrich. Um de vollegenden daag ôp zôndig voetballe te gaon kiéke vân Luuk.

Mei door alles heejbaove genump, wâs-se vör ándere deus en um de persoeën daen se bees, hebbe weej âs bestuur vân Karnevalsvereniging "de Keieschiéters" beslaote diech te beloeëne mit de oétreiking vân d’n Bônten Hoephap.

Mieër âs verdind, Profiesjat

Ârce Alaaf