D’n Bônten Hoephap 2025 vör Herman Valckx!

De oétreiking vân d’n Bônten Hoephap 2025 stônd dit jaor in ’t teiken vân ’n biezônder momént tiédes ‘Zing mei vân Ârce en dae kei’ ôp karnevalszaoterdig. In good ovverleg mit de femílie is dit passend tiédstip gekaoze um daegene in ’t zunke te zette daen ziech al mieër dân dertig jaor ônáfgebraoke inzet vör ‘t verenigingslaeve in ôs moeëje Ârce.

Dit jaor veel die ieër te beurt ân Herman Valckx. Unne mán daen binne verschillende vereniginge en kemissies ’n ônoétwisbare beejdrage haet geleverd. Zoeë vervulde haen mieër dân tién jaor verschillende rolle binne ’t bestuur vân DEV, stônd haen ân d’n bazis vân de bundeling vân vereniginge in Ârce en waor haen mâr lifs ellef jaor veurzitter vân SV Arcen. Ok waor Herman mei-inisjatiefnemer vân de Omnivereniging.

Ziene enormen inzet deej haen noeëjt allieën. Thoés kreeg Herman alle steun vân ziene partner Jacqueline, steun daen ônmisbaar waor beej alles wât Herman vör Ârce haet beteikend. Allebei waore en zien ze nag now betrokke beej ’t Ârcese verenigingslaeve, ôndanks dât ze neet in Ârce woeëne. Ôp dínsdig reeje ze dukker same richting Ârce. Herman vör vergaderinge, Jacqueline naor de rippetisie van Avolon. Dân áltiéd mit de áfspraok dât Herman eur nao áfloeëp wer zuj kômme ôphale. Dât ging áltiéd good…… behalleve daen ieëne kieër waorin Herman, nao ’n lange vergadering en mit de kop nag vól gedáchte, zônder ziene partner naor hoés reej. Pas thoés realizeerde haen ziech dât haen Jacqueline vergaete waor, waorôp haen geliek wer trug naor Ârce reej. Gelukkig kooste ze d’r later same hârd um lache. Zellefs ’t baeste paerd vân stál verguut wâl us wât.

’t Bestuur vân Karnevalsvereniging De Keieschiéters haet unaniem beslaote Herman te waardere vör zien enorme beejdrage ân ôs gemínschap.

Unne greep oét d’n indrukwekkende staot vân dins.

Herman haet door de jaore hin ônder mieër:

• 19 à 20 jaor voetbaltoernooie vör de schoeëljeugd georganizeerd
• Jaorelang jeugdleider beej DEV gewès
• Verschillende sportdaag en jeugdtoernooie ôpgezatte
• Verschillende funksies vervuld binne DEV, waorônder lid vân de kemissie klubblaad en de internet kemissie
• ’t Traeningskámp vör de seleksie en ‘t 75-jäörig jubileum vân DEV mit georganizeerd
• Vân 2001 wies 2008 sikkretaris en vân 2007 wies 2015 veurzitter vân DEV gewès
• Gehaolepe beej ’t realizere vân ’t ni-je klubhoés vân DEV
• Jaorelang aktief gewès âs scheidsrechter en lid vân de vreejwilligerskemissie
• Dieël oétgemâk vân de steurgroep Venlo Verbroedert (2013-2018)
• Mei-inisjatiefnemer en veurzitter vân SV Arcen (2010-2018)
• ’n Centrale rol gespeuld beej de fuzie vân FC Arcen (2018-2021)
• Dukker keuningsdaag georganizeerd en de ni-jjaorswándeling ôpgezatte
• Ziech ingezatte vör de aanstelling vân vertrouwespersoeëne binne Ârce

Dit is mâr ’n dieël vân wât Herman in ál die jaore haet gedaon.

’n Wâlverdinde waardering

D’n Bônten Hoephap 2025 is daormei mieër dân teraech oétgereikt ân eemus daen ziech mit hârt en zeel haet ingezatte vôr ‘t Ârcese verenigingslaeve. De gemínschap, de vereniginge en talloze leeje hebbe dánkzij Herman kunne raekene ôp entoezjasme, betrokkenheid en unne neet-áflaotenden inzet.

Herman, vân hârte profiesjat en hieël völ dánk vör wâs-se vör Ârce haes gedaon.

Ârce Alaaf!