't is Haors dât zienen Dreumel iért, mâr Ârce ziene Kei.

Zoë eindigt unne bekende Ârcese schlager. En daen Kei haet natuurlik te make mit d’n beejnaam waorônder me Ârce en zien inwoëners al sinds iëewe kent, de Keieschiéters.

Zoë-âs we wiëte is de naam nao alle waorschienlikheid gegaeve door in daen tiéd áfgunstige umliggende plâtse, die jaloers waore ôp de toen al mit maaskeie geplaveide straote in Ârce.

We wiëte ok dât Ârce in de 19^de iëew al vastenaovendaktiviteite organizeerde waorbeej we de naam Keieschiéters taegekômme. ’t Is daorum ni vremd dât ôs vereniging beej de ôpreechting in 1952 de naam Keieschiéters haet aangenaome.

’t Waor in 1969 beej gelaegenheid vân de jaorlikse Aldewiéverdaag dât de alde wiéver Mia Kallen en Miets Cox mit ’t idee kwaome de Keieschiéter ’n beeltenis te gaeve in de vaörem vân ’n standbeeld. Dit zuj dân vânáf d’n Aldewiéverdaag wies aswoensdig ’n plâts môtte kriége ôp de maert. Aldus ginge de twië vrouwluuj naor ôzze plâtselikke kúnstenaer Peter van ’t Hof, daen ’t idee miër dân laevesgroët gestalte goof mit ’n gezeech, unnen hood, liéf en leeje en naotuurlik ’n nâkse vot. Wât dae man zoot te doon waor duudelik en de Keieschiéter en de tradisie vân zien beeltenis ôp de maert waor gebaore.

Weej kenne vânáf dân, de beeltenis in verschillende vaörme, âs logo ôp de vlage, die in de Karnevalstiéd de Ârcese gevels siére, mâr vörál ok âs beeldje dât door ôs vereniging wört oétgereik beej biezôndere gelaegenhede. ’t Woord jaore ôntwaorpe en gemâk door ôs aller Berna Marcelis, daornao door Lea Cornelissen.

Wât nag ôntbrook waor ’n saort zellefde beeld dât ’t gánse jaor door ôs daörep zuj siére.

Beej 't 5x11 jaörig jubileum vân de vereniging woord ’n fônds ôpgereech waorin ínkele gifte gestort woorde die weej beej ôs jubileumresepsie krege. Daornao is ’t “mets in ’t vaerke bliéve staeke” en is ’t saldo 11 jaor ôp de bank bliéve staon. Mit dât startbedraag âs basis, hebbe de Iéreleeje en leeje vân Verdinste vân ôs vereniging ’t inisjatief naor ziech toegehaald um beej gelaegenheid vân 't 6x11 jaörig jubileum vân de vereniging ’t daörep te siére mit unne brônze Keieschiéter.

In Aleid Ariëns oét Berge hebbe zeej de kúnstenaeres gevônde die ’t beeld zoë-âs weej dât kende, wies in perfeksie, in wás haet vaörem gegaeve. Beej brônsgieter Rob van den Broek in Afferde is ’t beeld gegaote. Normaal gespraoke zuj ’t beeld ’n plâts môtte hebbe, boéte, örges midden in ’t daörep. Evvel gezeen ‘t risiko dât daorbeej geloëpe wört is beslaote ’t ’n plâts te gaeve in ’t gebouw dât ’n sentrale funksie haet in ôs daörep en waorin ziech völ gemínschapsaktiviteite áfspeule, MFA de Schans.

Ôp d'n 11^de vân d'n 11^de in 2017 woord de Keieschiéter daor ônthuld en door de inisjatiefnemers in behiër gegaeve ân ôs vereniging mit de naodrukkelikke ôpdrach d'r good ôp te lette.

Weej âs Karnevalsvereniging en hoeders vân de naam de Keieschiéters, zien ôs Iéreleeje, leeje vân Verdinste en iéderiën daen finansjeel of ôp 'n ándere meniér haet beejgedrage tot verwezelikking vân dees prachtige brônze kreasie vân de Keieschiéter, hiél aerig dánkbaar!