ôs hoeëghede

Proklamasie

Weej, Príns Rick d’n Örste,

Beej de grasie vân de Raod vân Ellef,

Príns vân Ârce, zônder die vân Lômm en Vélde,

Zoeën vân Marius en Wilma Broeren en grötse pap vân June, Boaz en Sam,

Groeëtvors in de Orde vân d’n Ârcese Kei,

Kommandeur in de Orde vân d’n Hoephap,

Beschaeremhieër vân ’t zwake geslach vân ’n ech Ârces megje,

Ridder in de Orde vân de leukste vriendegroep zônder fatsoenlikke naam,

Keurvors in ’t zörge dât ôs gaste ’n geweldige vakánsie hebbe ôp Resort Arcen,

Groeëtmeister ôp ’t middevéld ôp de zôndiggemérge beej DEV-3,

Gouverneur in ’t schaakmat zette vân iederieën daen mich oétdaag vör ’n pötje schake,

Ridder in de Orde vân ’t rôndfietse in ôzze bakfiets mit mien 3 schatte vân kiénder

Alzoeë weej in ovverwaeging genaome hebbende, dât 't dinstig is um verordeninge te treffe in 't belang vân ôs ônderdane, gelet ôp artikel 11 vân 't vastenaovesriggelemént, verordene weej en doon te wieëte,

Ten Örste:

Dât ’t nów wâl 'n hieële kale bedoening is gewaore ôp de Maasstraot mit ál die gekapte buuëm. Haopelik kriége we d'r wer gauw wât moeëjs vör trug, zoeë-dât dees straot wer wât ekstra oétstraoling krieg

Ten Twedde:

Dât ik oow wil melde dât ik door mien funksie âs Príns de kômmenden tiéd iets minder in de horeca vân Resort te vínde bin. Wôjt geej d'r nag unne kômme drínke beej mich ôp Resort, dân is mien advies dât we d'r mâr unnen ekstra same drínke heej vânaovend.

Ten Derde:

Dât ik ’t super vind dât door ’n aantal inisjatiefnemers de kermis ’n moeëje ni-je plek haet gekrege. Ik kiék d'r dân alwèr naor oét um vollegend jaor wer ’n fieësje te gaon bouwe ôp dees ni-je lokasie.

Ten Verde:

Dât ik in ’t begin vân ’t jaor in de brevebus keek en mich effe schrôk umdât ik dooch dât ik unne graties paoszegel hâj gekrege. Mâr naor good kiéke bleek dât de ni-je Maasdaörpe te zien.

Ten Viefde:

Dât ik nów neet mit mien kiénder nevve de Maas kân loeëpe en schômmele beej opa Piet in d’n haof vind ik wâl jaomer, mâr heejdoor zien we wâl de kômmende jaore veilig vân ’t hoeëge water. Dus mínse bliéf pozitief en bekiék ’t vör de langere termién.

Ten Zesde:

Dât nao jaore DEV 1 wer kampioen is gewaore is natuurlik super moeëj. Haopelik kunne alle voetballers nag lang speule ôp ôs schitterend Ârces sportpárk en hoeve we neet al te gauw same, mit die voetbalklub 7 km. naor ’t zuuje.

Ten Zivvende:

Dât dit unne geweldige Karneval gieët waere bleek al beej ’t inschete vân d’n Ellefde vân d’n Ellefde. Dit umdât weej nao ’t derde schot al mieër scheut gelost hâje dân die in de stad.

Ten Achste:

Dât de parkeerprobleme nag áltiéd neet zien ôpgelos is ok ’n drama. Haopelik gieët de Gemínt vlot in gesprek mit de kestieëltuine en kunne ze heej-in samewaerike vör in de toekôms.

Ten Niggende:

Dât wannieër geej vân plan ziet unne karnevalswage te bouwe vör d’n ôptoch en daen ôp tiéd áf môt zien, ik oow neet aanraoj um Walter te belle vân Help mijn man is klusser.

Ten Tiende:

Dât ik ôzze ni-je kaplaon Siju Vincent hieël völ suksés wíns in ôs moeëje kaerik en dât ik nów al oétkiék naor de Mis ôp karnevalszôndig.

Ten Ellefde:

Dât ik mit mien Dansmarietje Daantje d'r unne geweldigge en ônvergaetelikke karneval vân gui make en oow allemaol haop te zeen mit dees geweldige daag!!!

Aldus gegaeve te Ârce 21 november 2025

Príns Rick d'n Örste