Proclemasie

Weej, Prins Roel d’n Örste,

Beej de grasie vân de Raod vân Ellef,

Príns vân Ârce, zônder Lômm en Vélde

Groëtvorst in de orde vân d’n Ârcese kei,

Kommandeur in de orde vân d’n Hoephap,

Rots in de branding in de verdediging vân ‘t Örs vân D.E.V.

Ridder in de orde vân vriendegroep “de Gangmakers”,

Beschaeremhiër vân ’t zwake geslach vân de Maliebaan,

Keurvorst vân de zomeraovendvoetballers vân ’t Pleintje twië,

Groëtmeister in ’t beroepsmatig zitte achter de kompjoéter,

Ridder in de orde vân de Lage Lei,

Keurvorst in de orde vân Jông Ârce,

Groëtmeister in ’t bliéve hange nao ’t voetballe,

Alzoë weej in ovverwaeging genaome hebbende dât ’t dinstig is um verordeninge te make in het belang vân ôs ônderdane, gelet op ’t bepaalde in artikel ellef vân ’t vastenaovesregelemént verordene weej en doon te wiëte:

1. Dât mien vriendegroep toch wâl unne veuroétzeende kiék môt hebbe gehad, woej ze mich op ôzzen trouwdaag âs príns hebbe oétgerope. Vör eur waor ’t misschien ’n grapje, vör mich ’n welkômme generale rippetiesie .

2. Dât weej burgemeister Frissen vân hârte fillesitere mit zien beneuming in Horst, mâr weej eum wâl wille laote maerike dât ’t neet de bedoeling is dât ’t regionale V.V.V.- kantoër now ok nao d’n ándere kánt vân de Maas giët.

3. Dât de verkiërssituwasie op de Lingsforterwaeg now toch wâl ech zörgelik wört. D’r wört te hârd gereeje, ’t is d’r völ te druk en de zwaore vrachwages mit zánd goëje d’r nag ’n ekstra schupke baovenôp.

4. Dât d’r vân ambtenare duk verteld wört dât ze traog en lánkzaam zien. Mâr is dât wâl zoë? Âsse zuús wievöl d’r de letsten tiëd in ’n rap en vlot tempo ôs Gemíntehoés zien oétgerend beginne weej daor toch wâl ân te twiefele.

5. Dât de ni-jen ôpzet vân ’t Sintermertesfiës aerig geslaag meug waere genump. De kiénder bliej, de elders gelukkig en pestoër tevreeje, want zien kaerik zoot wer alderwets vól.

6. Dât ôzzen dokter mit de zomermond, zwaak, kránk en misselik wört vân ’t völ waerik mit de toeriste en d’r neemus in de buurt is waor haen teraech kân vör ’n heilend resepje.

7. Ârce en water. Örs ’t termaalbad, dân 3 kiër de hoëg Maas die ôs hâs köpke ônder löt gaon en áfgeloëpe jaor de gesprônge waterleidinge die völ mínse in ’t daörep ’t water wies ân de lippe leet stijge. Vörluuëpig hebbe weej d’r d’n boek vân vól.

8. Dât weej ôzze waornemend burgemeister Mevrouw Kersten völ suksés en wiésheid wille toewínse tiédes eur periode heer in Ârce, mâr dât ’t neet zoë is woej ’t in de kránt stônd: dât unnen burgemeister heer ’n loézelaeventje haet. Dât telt alliën mit de vastenaovend, âs ik ’t heer vör ’t zeggen heb.

9. Dât de manier waorôp d’r nao hâs 25 jaor ’n end is gekômme ân de sfeermaerte, now neet bepaold de schoënheidspriés verdint. Âs iederiën daen d’r mei te make haet de naas wer dezellefde kánt op löt wiéze, dân is d’r baés ’n good alternatief vör te bedínke. Dât hebbe we toch al gezeen beej d’n daag vân ’t straottheater.

10. Dât ôs vastenaovesloods eindelik klaor is. Now ’t woënzörrigkompleks nag. Of blief dât vörluuëpig miër zörrig dân woëne en kriége ôs seniore d’r alliën nag mâr miër komplekse vân.

11. Dât ik d’r op haop en vertrouw dât d’r völ keieschiéters en keieschiéterinnekes ân ôs ôptochte zulle meidoon, Mâr woej kômme weej ân bouwruumtes? Waen haelept ôs wagebouwers ân ’n daak bovve de kop.

Gegaeve te Ârce, vastenaovend 12 jannewarie 2001

Prins Roel d’n Örste