Os hoëghede

Proclemasie

Weej Prins Ed d’n Örste,

Beej de grasie vân de Raod vân Ellef,

Príns vân Ârce, zônder Lômm en Vélde,

Groëtvors in de orde vân d’n Ârcese Kei,

Kommandeur in de orde vân d’n Hoephap,

Steun en toeverlaot vân ’t twedde elleftál vân DEV,

Werreldreiziger vân de oktoëberfiëste in München wies ân Pinkpop in Landgraaf,

Ridder in de orde vân vriendegroep de Labusse,

Beschaéremhiër vân ’t zwake geslach vân de Lingsforterwaeg,

Keurvors vân de jeugleiders vân de voetbalclub,

Ridder in de orde vân de Alde Gild,

Kommandeur in de orde vân ’t gemínteperseniël,

Groëtvorst in de orde vân de horeca-kemissie vân de Keieschiéters,

Keurvorst in de orde vân de zomeraovendvoetballers vân ’t Pleintje II,

Ridder in de orde vân de Liëbaerig,

Kommandeur in de orde vân mannekoër ’t Remspaor,

Alzoë weej in ovverwaeging genaome hebbende, dat ’t dinstig is um verordeninge te treffe, in ’t belang vân ôs ônderdane, gelet ôp ’t bepaalde in artikel 11 vân ’t vastenaovesriggelemént, verordene weej en doon te wiëte:

Ten örste: Dât weej in de kránt hebbe gelaeze dât ôzzen burgemeister de huús in Ârce te deur vônd en dât weej dínke dât haen daorum mâr in Vélde is gaon woëne en weej dât wâl kunne begriépe. Twedde keus is áltiéd gôdkoëper.

Ten twedde: Dât ik d'r ôp haop en vertrouw, dât d'r dit jaor wâl genôg waórs is mit Bastianus,

zoëdât weej neet wer mit hônger thoéskômme zoë wie ’t vörrig jaor.

Ten derde: Dât ik mich âs gewoëne burger ok rot geschrôkke bin vân de völste hoëge OZB-verhoëging. Mâr dât ik âs gemíntewaeriker wâl verwách dât de ekstra inkômste doorgesloés waere nao ’t personiël. En dân bedoel ik neet, vör ’t salaris vân d’n derde wethálder.

Ten verde: Dât ’t fiës vân de Alde Gild ’n groët suksés waor. ’n Pluum ôp d’n hood vör de organisasie en alle vreejwilligers is zeker ôp zien plâts.

Ten viefde: Dât Ârce gediëltelik wer ônder löp, al kump ’t now door gesprônge waterleidige. Weej kunne ôs neet veurstelle dât dât de bedoeling is vân “Bad Ârce”.

Ten zesde: Dât weej mit voldoening gekonstateerd hebbe, dât ôs gemíntelikke berichte wer terug zien waor ze thoés huure, namelik in ôs eige Vos-taims.

Ten zivvende: Dât ik ’t ’n staerik púnt vind vân ’t bestuur vân DEV, dât ze gen paniekvoetbál zien gaon speule, now de risseltáte vân ’t örste elleftál zoë taegevalle. Mâr juus now eur vertrouwe hebbe oétgespraoke in d’n traéner. Âs de speulers now ok nag púnte gaon hale, dân hôvve ze misschien nag neet ’t véld te ruume oét de verde klasse.

Ten achste: Dât ’t mich is taegegevalle dât ’n ni-j gekaoze raodslid al drek beej d’n örste d’n baéste taegeslaag ôpstapt. Daornao wört d'r ok nag unnen ambtenaar beschuldigd en tenslotte wörd ok nag ’t gemíntebestuur vör de raechter gedaagd. Kortum de ALEV ôs eige LPF.

Ten niggende: Dât ik de waergode wil verzeuke um vânáf nów toet en mit Aswoensdig vör good waer te zörrige, umdât ik vörluuëpig weinig tiéd heb um snieëj te ruume of gladde waeg te strouwe.

Ten tiende: Dât ôs jeug neet miër ôp de Weierd meug schâtse âs daen toegevraoren is, mâr dât weej teggewaorig twië iésmeisters in ’t daörep hebbe die de maert verándere in ’n iésbaan. Iëne vân die twië haet ok ervaring in ’t bouwe vân zwimbade. Dât guf gôjen haop vör de kômmende zomer.

Ten ellefde: Dât ik ok, names mien dansmarietje Linda, alle Keieschiéters en Keieschiéterinnekes wil ôprope um same mit ôs de kômmende Vastenaovend te viére. En daorbeej wil ik spesjaal wiéze ôp d’n ôptoch. Vân mich meug geej daor wâl rotzooi make. Ik zörrig d'r wâl veur, dât ik de daag nao Vastenaovend vreej bin, zoëdât mien kollégaas d’n troep ôp kunne ruume.

Aldus gegaeve te Ârce,

Vastenaovend 2003

Prins Ed d'n Örste