Os hoëghede

Proclemasie

Weej, Prins Mario d’n Örste,

Beej de grasie vân de Raod vân Ellef,

Príns vân Ârce, zônder Lômm en Vélde,

Groëtvors in de orde vân d’n Ârcese Kei,

Kommandeur in de orde vân d’n Hoephap,

Beschaéremhiër vân ’t zwake geslách vân de Barones,

Groëtmeister vân de passieve leeje en de jeugleiders vân DEV,

Ridder in de orde vân de vriendeklub “de Liëbaerigtrippers”,

Groëtvors in ’t kuite mit mien bláge,

Bespeuler vân ’t senterkórt ôp de Brandemeule beej de vriejdigaovend-kompetiesie,

Groëtmeister in ’t inne vân oow zoorverdinde belastingcénte,

Groétvors in de orde vân de Liëbaerig,

Kommandeur in ’t waekeliks trimme tussen ’t Aegelder en de Hamert,

Ridder in de orde vân de Alde Gild,

Groëtmeister in ’t karpers ân d’n haok slaon en ôp ’t druuëge hale.

Alzoë weej in ovverwaeging genaome hebbende, dat ’t dinstig is um verordeninge te treffe, in ’t belang vân ôs ônderdane. Gelet ôp ’t bepaalde in artikel 11 vân ’t vastenaovesriggelemént, verordene weej en doon te wiëte:

Ten örste: Dât ’t mich deug deut, dât ’t woën-zörrig kompleks has klaor is, en ôs seniore die haölep nuuëdig hebbe, nôw neet miër hoeve te verhoéze, mâr fijn heej beej ôs in Ârce, in de Waag verzörrig kunne waere.

Ten twedde: Dât ik gekonstateerd heb dât “proef je streek” unne gôje start haet gemâk in Ârce, en dât ik haop, dât ’t regionaal good wört ôpgepak. Want ’t is ’n ivvenemént dât zeker de moeite waerd is um te bliéve bestaon.

Ten derde: dât ’t ônbegriépelik is dât ’t monumént ôp ’t Ovaal zô duk kapot gemâk wört. Weej hebbe vernaome dât dees vernielzuch de Gemínt aerig völ gaéld kaós. Gaéld dât weej zô good vör ándere zake in ôs daörep kunne gebroeke. Zoë waere letterlik en figuurlik ôs eige roéte ingegoëjd.

Ten verde: Dât Laefbaar Ârce, Lômm en Vélde neet aanwezig waor beej de begroëtingsvergadering, en ok neet beej ’t daorbeej huúrende dieneé. Âs-se hoég vân d’n taore wees blaoze, môs-se wâl ech hârt vör Ârce hebbe.

Ten viefde: Dât ik ’t jaomer vind, dât ôzze vastenaovend neet miër mit veurwaerik áfgeslaote kân waere. Mâr ’n good waord vân dánk in de richting vân dié mínse die dât jaorelang meugelik hebbe gemâk, is zeker ôp zien plâts.

Ten zesde: Dât ’t ôs verstendig liek um beej de vollegende roeteverándering vân de sfeermaért, vân te veure mit alle belanghebbende um de taffel te gaon zitte. Dât liek ôs vör alle partieje baeter en dân kunt geej oow de waeg nao ’t gereéch bespare.

Ten zivvende: Dât door ’t ôpstappe vân Lex, Ârce genne wethálder miër haet en dât weej aovergeleverd zien ân die drie musketiërs oét Vélde, (die hélde). Völ zulle die drie wâl wille verándere. Mâr ân iën ding kômme ze neet aan, en volleges mich deut eur dât baes wâl pien; de naam vân ôs Gemínt zal áltiéd ÂRCE en Vélde zien.

Ten achste: Dât Ârce 't áfgeloëpe jaor ok wer aardig ân de waeg getummerd haet um landelikke bekendheid te kriége. Áfgeloëpe zomer âs werremste plek vân Nederland en natuurlik ok door ôs brouwereej die geregeld via d’n tillevisie löt wiëte, dât tegge die werremte in Ârce ok nag ’n prima pilske gebrouwe wört.

Ten niggende: Dât door dieverze ramkrake en zellefs unnen aovervál ân hoés is gebleke dât in Ârce ok te weinig blauw ôp straot is. Misschien môtte we wâl wer trug nao unne schanderm à la Piëterske.

Ten tiende: Waen hâj dât gedoog. 17 Jaor lang waor Susan eure pap heer vorst/veurzitter, vör 9 jaor trug waor heej al ’t lánd vân Bartje. Ik hâj d'r neet miér ôp geteld dât ik nag zuj waere gebeld.

Ten ellefde: Dât ’t mich âs regerend príns hiël völ plezeer deut, um dit jaor, same mit mien dansmarietje Loes, oow veurôp te gaon mit de vastenaovend. Weej haope vân hârte dât weej same unne moëjen tiéd tegemoet gaon.

Aldus gegaeve te Ârce,

9 Jannewarie 2004

Prins Mario d'n Örste