Os hoëghede

Proclemasie

Weej, Príns Peter d’n örste

Beej de grasie vân de Raod vân Ellef ,

Príns vân Ârce, zônder Lômm en Vélde.

Groëtvors in de Orde vân d’n Ârcese kei,

Kommandeur in de Orde vân d’n Hoephap,

Beschaeremhiër vân ’t zwake geslach vân de Maasstraot,

Kreatief brein áchter ’t ôntwaerepe vân ’t keuningszilver en ’t schuttersvaandel,

Ridder in de Orde vân de Kingstraot,

Groëtmeister in de Orde vân toniëlvereniging “’t Iésgenot” vân de Ârcese kestiëltuine,

Kommandeur in ’t kriéte vân de keu en ’t make vân karambools beej biljartklup “de Inaborg”,

Keurvors in ’t gaeve vân ônderwiés ân groep viéf vân de Bergse Klimopschoël.

Ridder in de Orde vân de Alde Gild,

Groëtmeister in ’t speule mit mien blage Giel en Janske,

Kommandeur vân de bekkingvoowkels beej ’t pas gehálde Karneval in Konsert.

Groët liefhebber vân de drie T´s, te wiëte: trômme, traöte en toéte.

Ridder in de Orde vân de Drriebkes.

Alzoë weej in ovverwaeging genaome hebbende, dat ’t dinstig is um verordeninge te treffe in ’t belang vân ôs ônderdane, gelet ôp ’t bepaalde in artikel ellef vân 't vastenaovesriggelement, verordene weej en doon te wiete:

Ten Örste: Dât d'r eemus ôp ’t idee is gekômme um ’n stuk vân de Inaborg weg te kappe, is gewoën belachelik. Zoë verdwient d'r ’n prachtig stukske vân Ârce, mâr dât is nag neet alles. Waor môtte de mínse dân mit eure rotzooi naor toe daen ze daor áltiéd neergoëje?

Ten Twedde: Dât ôs vreejaazje mit Venlo alliën mâr heftiger wört. Nao ’t archief is nów ok al de áfdiëling aopenbare waerike nao Venlo vertrokke. ’t Begint d'r nów wâl staerik ôp te liéke dât vân dees samewaeriking ôp d’n duur toch samesmaelting kump, of vergaet ik mich en meuge weej toch nag haop hálde.

Ten Derde: Dât de OPA´s oétgebreid Prinsjesdaag gevierd hebbe is bekend. Daags d'r nao koos-se ôp Ârce onlajn laeze wât de schaaj allemaol waor: ’n sleutelbiën in de kreukels, ôprope vör pette die me verlaore waor en d'r waor d'r ok nag unne zónder breel thoésgekômme. En oét betrouwbare brôn heb ik vernaome dât daags d'r nao völ OPA´s stukke vân de fillem kwiét waore.

Ten Verde: Dât de mínse in La Tour Meuse jaomer genog neet mit mit allemán door iën deur kunne en dât dât toch wâl vervaelend is âs-se allemaol ônder iën daak lefs. Âs de situwasie zoë blief zoë wie ze nów is, dân is ’t misschien te ovverwaege um de bus die dao has vör de deur stopt, nao Remund te laote reeje in plâts vân nao Venlo.

Ten Viefde: Dât twië groëte kulturele vereniginge oét ôs daörep zich prima gevônde hebbe in de organizasie vân ’t Karneval in Konsert. ’n Kompelemént vör de Keuninklikke Hermenie en vör De Keieschiéters is ôp zien plâts en wâlgemend.

Ten Zesde: Dât de verkiezinge eur schaduwe veuroét goëje is duudelik. De Gemínschapslies zal neet miër trugkômme, mâr die plâts zuj wâl is nao Lex van Marcke kunne gaon, daen zienne kômbek mâkt. Verder bin ik beni-jt of de koaliesie stánd hilt, of zal de val vân Ien Jacobs illustratief zien vör de val vân ’t CDA.

Ten Zivvende: Dât d'r in Ârce ôp ’t momént völ wört aover genaome; ’t Klein Vink vân Wiel Verberkt giët nao de Roompot, Hayke en Henk gaon wiër in de spaore vân Jos vân de Smale, beej de Kestiëltuine kômme de örste geruchte nao baove en ’t liek d'r ôp dât Nelisse de makelaardeej vân Max en Ton giët aoverneme. Hoewâl we d'r wâl vör môtte wake dât dae letste neet te groët wört, ánders hebbe we strakkes niks miër te zegge in ôs eige daörep.

Ten Achste: Dât ’t mich bekend is dât de Gemínt ôp zwart zaot zit, mâr dât ik haop dât d'r örges nag unne pot mit géld gevônde wört um ôs multiefunksjoneel gebouw te realiezere. Âs de raod en ’t kolleezje dât vör mekaar krieg meuge ze vân mich nag baés unne kiër aete ôp koste vân de Gemínt.

Ten Niggende: Dat Ârce Winterwônderlik d'r iëne waor vân, ik wil wâl mâr ik kân neet. Âs we miër vân dees dergelikke “aktiviteite” gaon organizere, dân dínk ik dât de gôje naam daen Ârce haet ôpgebouwd in de regio gauw verlaore zal gaon. Dus laote we mit allemán áfspraeke: We doon iets good of we doon ’t neet!

Ten Tiende: Dât ôzzen ald-burgemeister Frissen gouverneur is gewaore en weej eum dât vân hârte gunne. En dât weej d'r ôp haope en vertrouwe dât haen nag völ ân zien alde gemínt zal trugdínke. Vörál beej ’t toekenne vân subsidies en dergelikke.

Ten Ellefde: Dât ik ’t geweldig vind dât ik same mit mien dansmarietje Esther in dit jubileumjaor veurôp meug gaon. En mit de steun vân alle Keieschiéters en Keieschiéterinnekes môt ’t ôs toch lukke um d'r ’n geweldig jaor vân te make.

Aldus gegaeve te Ârce

Vastenaovend 2006

Príns Peter d’n Örste