Os hoëghede

Proclemasie

Weej, Príns Ron d’n örste

Beej de grasie vân de Raod vân Ellef ,

Príns vân Ârce, zônder Lômm en Vélde.

Groëtvors in de Orde vân d’n Ârcese Kei,

Kommandeur in de Orde vân d’n Hoephap,

Beschaeremhiër vân ’t zwake geslach vân ’t Lômmse Thiëtuiteriék,

Keurvors vân de toernooikemissie vân A.V. Flash,

Groëtmeister in ’t ônderhálde vân klántekontakte beej “Penske” in Venlo,

Ridder in de Orde vân de Alde Gild,

Kommandeur in de Orde vân d’n Boorewaeg,

Groëtvors in de Orde vân de Kiénderkarneval…

en ’t bestuur vân Karnevalsvereniging "de Keieschiéters",

Ârcese techneut vân d’n artiestegroep Neet Oét Ârce,

Groëtmeister in hálsbraekende toere oéthale ôp de lange latte,

Ridder in de Orde vân Jông Ârce,

Kommandeur in ’t verwenne vân ôs daochter Renee,

Keurvorst vân vriendegroep de “Gangmakers”.

Alzoë weej in ovverwaeging genaome hebbende, dat ’t dinstig is um verordeninge te treffe in ’t belang vân ôs ônderdane, gelet ôp ’t bepaalde in artikel ellef vân 't vastenaovesriggelement, verordene weej en doon te wiete:

Ten Örste:

Dât de verrassing kompleet waor mit de verkiezinge: wins en verlees gaon hand in hand same verder. Mâr wet geej waen d'r ech gewônne haet? Weej, de Keieschiéters. Want weej staon nów veur mit 2-0 ôp Vélde en dân bedoel ik natuurlik neet mit voetballe, mâr uiteraard mit ôs wethálders Lex en Wil.

Ten Twedde:

Dât ôs daörep d'r, ôp zien zachs gezág, momenteel neet ôp zien baes beej leet. De Wál mit zien laege huús guf unnen troësteloëzen aanblik. Vân dât haölter schot ôppe maert kries-se ok al gen gôj zin en dân zien d'r nag de toe deure beej de slaechter en de Alde Hoeve. Gelukkig dât de prachtige kersverleechting eur waerik deut en toch alles nag ’n bietje ôpvrolikt.

Ten Derde:

Dât de Jông Gild mit de organizasie vân eur jubileumfiës haet laote zeen dât ze miër kunne dân alliën mâr zoépe. ’t Fiës waor prima georganizeerd en klônk wie ’n klok. De foto´s die ôp Ârce on lain stônde vân nao ’t Sinterklaos binne hale zulle we mâr vergaete.

Ten Verde:

Dât de blessure die ôzzen burgemeister haet ôpgeloëpe ernstiger is, dân dât ’t in örste instansie leet aanzeen. Mâr dât haen nów gelukkig wer ân de baeterende hand is. Ik wil eum in ieder geval vânáf dees plâts völ sukses en sterkte toewínse beej zien laeste stepke nao volledig herstel.

Ten Viefde:

Dât ik ’t aerig vremd vind dât de gemint subsidie guf vör ’t projekt Rembrandt ôp de Ârcese dake en vör dât zellefde projekt vervolleges gen vergunning afguf. Zuj pestoër wâl ’n vergunning hebbe um daen kaerikwién te meuge schudde?

Ten Zesde:

Ik zeg: “Wao giët ’t hin mit de kestiëltuine?” Geaöpend in de vörrige iëuw. ’t Waor of te waerem, te kált, te naat of te druuëg. En áfgeloëpe jaor völ te waerem. Is ’t daorum dât de kurator de tuinen in d’n iéskás haet gezatte, of is d'r gewoën éch te weing spiktakel?

Ten Zivvende:

Dât de revue ter gelaegenheid vân 't 5 x 11 jaörig bestaon vân de Keieschiéters geweldig waor hebbe we allemaol kunne zeen en huúre. ’n Kompelemént vör iederiën daen daor, ôp wât vör ’n maniër dân ok, zien stiëntje ân haet beejgedrage is diek verdind en zeker ôp zien plâts.

Ten Achste:

Dât de bewoëners vân de Lingsfort völ klage ovver de snelheid beej eur ôp de waeg. De gemínt deej vanalles: snelheidsremmers woorde d'r gelág, ’t woord bebouwde kôm, vrachverkiër moos ovver de Loëi. Niks bâtte d'r. ’t Laeste redmiddel: hiël völ snelheidskontrôles. En nów meug geej raoje waor de meiste bônne nao toe ginge!!!! Ik wiët ’t wâl.

Ten Niggende:

Dât de braderie 25 jaor áld waor hebbe we gewiëte. ’n Zivvende braderie vör alle Arcenare âs dánk vör jaorelange aoverlás kompleet mit vastenaovesmuziek. Beer vör unnen Euro en hiël völ mínse ôppe biën. Koos ’t mâr áltiéd zoë zien en dân bedoel ik vörál d’n beerpriés. Wât zuj ’t dân wer aoverál druk zien in de kefeés.

Ten Tiende:

Dât de gemínt vör de toekôms ambietsieuze planne haet, kân ik aerig wârdeere. De kôms vân de Multie Funksionele Akkemodasie stiët daorin centraal. Ik wil iederiën daen dao wât ovver te zegge haet ôprope de hand iniën de slaon. De kôms vân ’t M.F.A. is vör Ârce té belangriék um pôlletieke spelkes mit te speule.

Ten Ellefde:

Dât ik haop en vertrouw dât alle Keieschiéters en Keieschiéterinnekes d'r vör zulle zörrige dât mien dansmarietje Suzanne en natuurlik ikzelf nag hiël völ jaor mit völ plezeer zulle trugdínke ân de Vastenaovend vân 2007. De karneval daen weej âs Príns en Dansmarietje veurôp meugden gaon.

Aldus gegaeve te Ârce

Vastenaovend 2007

Príns Ron d’n Örste