Os hoëghede

Proclemasie

Weej, Prins Robbie d’n Örste,

Beej de grasie vân de Raod vân Ellef,

Prins vân Ârce, zônder die vân Lômm en Vélde,

Groëtvors in de Orde vân d'n Ârcese Kei,

Kommandeur in de Orde vân d’n Hoephap,

Beschaeremhiër vân 't zwake geslách vân Keieschieterinnekes afkômstig vân de Kingstraot,

Groëtvors beej de jeugdkemissie vân DEV-Ârce,

Groëtmeister in de Orde vân penningmeister vân de wiéze Raod vân Ellef,

Ridder in de orde vân karnevalsgroep “Boutmaf”,

Beschaeremhier vân ôs Keieschiéters kienkemissie,

Zoën vân Keith oët Bornmouth en Tineke oët de Stad,

Ridder in de Orde vân Keuning voetbal beej DEV-4,

Goeverneur in ’t keihârd meppe tegge unnen tennisbál beej Tennisclub Ârce.

Alzoë weej in ovverwaeging genaome hebbende, dât 't dinstig is um verordeninge te treffe in 't belang vân ôs ônderdane, gelet ôp artikel ellef van 't vastenaovesriggelemént, verordene weej en doon te wiëte,

Ten örste: Dât d'r in dit jubileumjaor ekstra gefiës môt waere en dât we dao dalik in de fwajee, nao áfloëp vân dees zitting geliek mit beginne.

Ten twedde: Dât “Príns vân Ârce” toch baeter bekt mit mien funksie beej de ING-bánk: Senior Consultant Acquisition Finance & Structured Lending, is nao ’n paar pilskes unnen echte tôngbraeker.

Ten derde: Dât ik haop dât de sikkretaris vân de Keieschiéters de vergunningen ôppen tiéd haet aangevroch, zoë-dât we neet, net âs de Jông Gild mit ’t vogelschete, ’t fiës ’n paar mond môtte oétstelle.

Ten verde: Dât mien vrouw in 1996 dansmarietje waor beej ôzze kiénderkarneval en dât die nów, diek 20 jaor later, nag net zô lenig is âs toen…….

Ten viefde: Dât we dân wâl unne ni-jen dokter hebbe, mâr dât de oétspraok: “A drink every day keeps the doctor away”, blief staon âs ’n hoés…

Ten zesde: Dât d’r geregeld ’n waterleiding springt in Ârce is helaas ôp dit momént miër regel âs oétzôndering. Laote we haope dât de beerleidinge vân Hertog Jan ’t ni zulle begaeve.

Ten zivvende: Dât de bewoëners vân de Wethalder v.d. Kampstraot nao 17 jaor wer meuge krénse. Ze zien beej dizze vân hârte oétgenuuëdigd, same mit die vân de Pastoër Houbenstraot. De oétspraok: Wie miër ziele, wie miër vreugd geldt nag áltiéd.

Ten achste: Dât ik haop dât we waergode ôs dit jaor baeter gezind zien, ’t Zuj zund zien âs ôzze splínterni-je Prínsewage same mit de aoverigge ôptochdiëlnemers wer ’n waek later zujje môtte trekke.

Ten niggende: Dât wies nów toe alle ivveneménte heej in ’t MFA ôntzettend good bezooch waere. Good te zeen dât Ârce d'r gezamelik de schouwers ônder zet um ’t tot ’n suksés te make.

Ten tiende: Dât iederiën en dân bedoel ik ok iederiën, neet alliën wört oétgenuuëdigd vör ôs prínseresepsie ôp karnevalszôndig, ma ok vör de jubileumresepsie vân de Keieschiéters ôp 4 fibberwarie aanstaonde. Weej zien d'r in ieder gevál beej….

Ten ellefde: Dât ik ’t geweldig vind, dât ik same mit mien Dansmarietje Irma in dit jubileumjaor veurôp meug gaon. En mit de steun vân alle Keieschiéters en Keieschiéterinnekes môt ’t ôs lukke um d'r ’n geweldig jaor vân te make.

Aldus gegaeve te Ârce, 14 jannewarie 2017,

Príns Robbie d’n Örste