Os hoëghede

Proclemasie

Weej, Prins Roel d’n Derde,

Beej de grasie vân de Raod vân Ellef.

Prins vân Ârce, zônder die vân Lômm en Vélde.

Groëtvors in de Orde vân d'n Ârcese Kei.

Kommandeur in de Orde vân d'n Hoephap.

Beschaeremhiër van 't zwake geslách vân de Keieschiéterinnekes vân d’n Boorewaeg.

Groëtvors in ’t legge vân hólt, of baeter gezág parket ôp de vloër.

Zoën vân Ger en Riet Schreven en grötse pap vân kiezelstiëntje Fenne.

Groetmeister in ’t houwe vân ’n belke ôp de golfbaan mit ’t klubke: “Chipje, putje, parretje”. Ridder in de orde vân ’t organisere vân ’t klein vastenaovesbál

Gouverneur beej vriendegroep Schik zât en de Labusse.

Burgemeister in ’t kaoke en verorbere vân dât gekokte mit de boergondiërs.

Alzoë weej in ovverwaeging genaome hebbende, dât 't dinstig is um verordeninge te treffe in 't belang vân ôs ônderdane, gelet ôp artikel ellef vân 't vastenaovesriggelemént, verordene weej en doon te wiëte,

Ten örste: Dât ’t wât langer haet gedeurd âs verwách, mâr ôs klein geüniformiërde gediëlte en de groëte Prínsegarde zien gáns in ’t ni-j gestaoke. Staon ze d'r ni prachtig ôp?

Ten twedde: Dât ôs keuninklikke Hermenie kân trugkiéke ôp ’n fantasties Top 2000 wiekènd, mit ôptraejes vân alliën ma eige artieste; dao meug Ârce gröts ôp zien. Laote we haope dât de Gemínt de subsidiekraan ni toedreijt.

Ten derde: Dât diezellefde Gemínt eur ni-jjaorsresepsie áfschaft meuge ze zellef wiëte. Die vân mich mit mien Dansmarietje Nicky ôp karnevalszôndig giet in alle gevál zeker door. Dât stiët vás!

Ten verde: Dât ik nów al vertién jaor in de Raod vân Ellef mei loëp en al völ prínse ôp de nek heb gehad. Bin beni-jd waen mich nów ôp ziene nek pak…

Ten viefde: Dât ik vân meining bin dât d'r vlot wât ân ’t parkeerbeleid in ôs daörepke gedaon môt waere. ’t Casperbrukske waor ’n good begin, mâr ik haop ôp ’n baetere ôplossing.

Ten zesde: Dât ôs moeëje alde Gemínthoés ’n ni-j bestemming gekrege haet is good vör ôs daörep. Ik haop dât de ni-jen oétbater en de vereniginge same tot mekaar kômme wât betref ’t gebroek vân ’t plein.

Ten zivvende: Dât de maniër waorôp d’n tandarts oét Ârce vertrokke is neet “kies” waor, dât meug duudelik zien. Nów môtte we nota bene nao Vélde um ôs ân de tand te laote veule.

Ten achste: Dât ok weej bliej zien mit de rotonde in Lômm. Nów kunne we ôs, âs we ôs bedínke, mekkelik umdreije um wer nao hoés te kômme.

Ten niggende: Dât d'r ’n zörrigkompleks in d’n alde klosterhaof kump is fantasties. Zoë hoeve mínse die permanénte zörrig nuuëdig hebbe ôs moeëje Ârce ni te verlaote.

Ten tiende: Dât ’t mich, net âs miene veurgenger, gegund woord um kleine en groëte Príns te meuge zien, vind ik fantasties. Ik haop dân ok dât d’n Boorewaeg vör d’n twedde kiër beej ôs wil kômme krénse.

Ten ellefde: Dât miene pap nów gröts ôp mich zuj zien, stiët vör mich vás en ik haop dât ik d'r same mit oow allemaol unne fantastiesen tiéd vân gui make.

Aldus gegaeve te Ârce, 11 jannewarie 2019,

Príns Roel d’n Derde