Os hoëghede

Proclemasie

Weej, Prins Dave d’n örste,

Beej de grasie vân de Raod vân Ellef,

Prins vân Ârce, zônder die vân Lômm en Vélde.

Zoeën vân Geert en Elly Peeters en grötse pap vân Jinthe en Levin.

Groeëtvors in de Orde vân d'n Ârcese Kei.

Kommandeur in de Orde vân d'n Hoephap.

Beschaeremhieër vân 't zwake geslách vân de Jocushane oét de stad.

Ridder in de Orde vân vriendegroep “Beej 1”.

Keurvors in ’t bouwe en verbouwe vân huús en alles wât d'r mei te make haet.

Groeëtmeister beej volleybalclub AV Flash en vân ’t darte beej kefee “de Maert”.

Gouverneur beej JO-8 vân DEV um die jônge mit traene in ’t gareel te hálde.

Ridder in de Orde vân de Kwakers beej ’t vollieje ôp de tribune vân AV Flash beej mien daochter.

Alzoë weej in ovverwaeging genaome hebbende, dât 't dinstig is um verordeninge te treffe in 't belang vân ôs ônderdane, gelet ôp artikel 11 vân 't vastenaovesriggelemént, verordene weej en doon te wieëte,

Ten örste: Dât ik ’t unnen hieële gôje zet vind, dât net âs ik, ok mien Dansmarietje Maartje vândaag heej ôp de zitting is oétgekômme.

Ten twedde: Dât, meug geej oow hoés nag wille verbouwe de kômmenden tiéd,

punt ieën ik ’t ekstra druk heb mit ’t prínselaeve en

punt twieë, ik oow ni kân garandére dât alles waterpas kumt te staon.

Ten derde: Dât ’t moeëj is um te zeen dât ’t centrum vân Ârce wer broésend is mit ’n aantal geweldige ônderneminge. Haopelik biejt dât völ moeëjs vör de toekôms vân Ârce.

Ten verde: Dât ’t aerig fijn is dât de vorstelikke huús ôp de Dunantstraot zien ôpgeleverd. Allieën wâl jaomer dât d'r mâr weinig Ârcese in teraech zien gekômme.

Ten viefde: Dât ’t sinds de zomer wer woensdig gehaktdaag is in Ârce, umdât we de viskraom neet mieër meuge verwelkômme in ôs moeëje daörep. Haopelik kump dizze wer trug, zoeë-dât we gow ôs viske wer kunne gaon aete.

Ten zesde: Dât ’t dit jaor ok uniek is dât ik d’n twedde Príns bin daen in ieën kalenderjaor is oétgekômme.

Ten zivvende: Dât ik mich áfvraog wannieër ik mich ’t baes kân inschriéve vör de sloop vân de alde bushaltes. Want ik kân thoés ok nag good ’n fietsehok gebroeke.

Ten achste: Dât ’t leuk is dât Venlo investeert in beveurbeeld Venlo verleech en allemaol moeëje leechkúns ôphingt in ôs daörep, mâr dât ze dân ok mâr is örs zörrige dât d'r good leech kump vân ’t kastieël naor de bushalte.

Ten niggende: Dât we hieël bliej zien dât Ârce ovver 'n paar waeke wer truggieët naor ’t jaor 1850 mit Scrooge. Fijn dât we verder gaon ôp de kreativiteit die Peter van ’t Hof haet naogelaote.

Ten tiende: Dât ik bliej bin dât ik neet ôp de Lingsforterwaeg woeën, umdât ik dân mit dees daag noeëjt hieël waor thoésgekômme ovver daen fietspaad.

Ten ellefde: Dât ik d'r mit mien Dansmarietje Maartje unne geweldigge en ônvergaetelikke karneval vân gui make en oow allemaol haop te zeen mit dees geweldigge daag.

Aldus gegaeve te Ârce 22 november 2024,

Príns Dave d'n Örste