ôs jeugdhoeëghede

Proklamasie

Weej, Prins Stein d'n Örste

Beej de grasie vân de kleine Raod vân Ellef,

Príns vân alle snôtneuze vân Ârce,

Beschaeremhieër vân basisschoeël de Weiert,

Ridder in de Orde vân groep 7 vân juf Jikke, juf Jasmijn en juf Sandy,

Groeëtmeister in ’t voetballe beej DEV JO-11,

Kommandeur in ’t speule in de speultuin,

Beschaeremhieër vân alle bewoeëners vân d`n Trip,

Hofmeister beej de tonieëlklub Pulcinella,

Ân alle jônges en megjes vân Ârce: ALAAF!

Alzoeë weej meine dât 't ônder ôs regering nuuëdig is um veurschrifte te gaeve ân alle kiezelstieën vân Ârce, en doon te wieëte:

Ten Örste:

Dât ik bliej bin dat ik âs Príns in ’t begin vân dees zitting bin oétgekômme. Zoeë kân ik de zitting in ieder geval gáns zeen en wört mien geduld ok neet ôp de proef gesteld.

Ten Twedde:

Dât ’t hanghökske nów ok aktiviteite organizeert vör de jeugd. Nów kân ik mit mien vriende iets gaon doon in plâts vân spelkes speule ôp mienen tillefoon.

Ten Derde:

Dât ik ’t ôntzettend jaomer vind dât d'r ôp schoeël gennen tiéd mieër is vör ’t make vân ’n fakkel mit Sintermerte. Laote we dees tradisie toch gewoeën hálde!

Ten Verde:

Dât ik bliej bin dât ’t GBT neet lang ôp schoeël is gewès. De bôtteramme vân mien mam zien toch lekkerder.

Ten Viefde:

Dât de Maasstraot aope leet en moeëjer wört vind ik prima, mâr ik haop dât de waeg naor miene favoriete snoepwínkel wâl good toegánkelik blief.

Ten Zesde:

Miene pap waor 20 jaor geleeje Príns en ik wieët zeker dât ok dizze karneval keitof gieët waere.

Ten Zivvende:

Dât ik same mit mien Dansmarietje Niene, de Adjudánte Miel en Quintijn en sirremoniemeister Thygo d'r unnen ônvergaetelikken tiéd vân zal make.

Aldus gegaeve te Ârce 23 november 2025

Príns Stein d'n Örste