Karneval 2020/2021

Baeste vastenaovendvierders,
 
Karneval is ’t fiës vân saamhuurigheid, verbroedering, meziek, plezeer en same geniete mit unne lach en ’n traon. We laeve ôp dit momént evvel in ’n ándere en tiédelikke maatschappeej waorin Corona heerst en d'r ándere regels gelde.
Heejdoor kump ôzze Karneval vân 2020/2021 in ’n ánder perspektief te staon en is ’t mit de inachtneming vân de regelgaeving rôndum Corona neet meugelik um de tradisjonele Vastenaovend vân Ârce te viere, zônder dât dao gröttere risiko’s ân verbônde zien. De gezôndheid vân mínse stiët ja áltiéd veurôp.
 
Nao lang beraod en mit pien in ôs hârt hebbe weej ’t moeilikke besloét môtte neme, dât de karneval 2020/2021 neet kân doorgaon in de vertrouwde vaörem.
 
Door dit besloét kunne we ôs ni-j hoëghede neet daen Vastenaovend bieje mit alle prach, praol en gezelligheid die ze verdene. Daorum is d'r beslaote um vör ’t seizoen 2020/2021 gen ni-je hoëghede oét te rope.
 
Same wille we vörál ni te lang stilstaon beej de dinge die neet meugelik zien, mâr vörál kiéke naor wât d'r wâl zuj kunne.
 
De coronaprobleemstelling is lástig en d'r bestiët gen patént resep. Iedere vereniging stiët vör de oétdaging heej eige ôplossinge vör te bedínke. Daorum hebbe we lang gewách mit dit schriéve, umdât weej örs ’n plan B en meugelik C wôje hebbe, vördât de tradisiegetrouwe Vastenaovend woord áfgelas.
Mit ôs kemissies, de Ârcese horeca en ándere zien weej druk bezig um alternatieve te bedínke en neer te zette vör ôs geleefde aktiviteite zoë-âs bv. de Ouverture, ’t kiene, de zittinge en de ôptochte. Natuurlik gáns ônder veurbeháld vân de dân geldende regels.
’t Zuj fijn zien âs iederiën heej mit ôs mei wil dinke en zien ideeje diëlt. Zoëgauw âs heej ni-j ôntwikkelinge in zien, zulle weej oow heejvân ôp de högte stelle.
 
Weej zien d'r vân ovvertuug, dât weej mit allemán d'r ’n gôje invulling aan kunne gaeve en zoë same unnen ándere, mâr toch unne moeëje Vastenaovend kunne belaeve.
 
Âs d'r vraoge, ideeje of aanvullinge zien, neem dân geraös kontak ôp mit ôs sikkretariaat.
 
Ârce Alaaf
 
't Bestuur



Geplaatst op 24-09-2020

PerCom Automatisering - Reuver & Weert
Terraq Bouwgrondstoffen

Òntworpe & Aangedreeve door Web-id
Copyright © 2020 De Keieschiéters Ârce
Vragen of opmerkingen over de inhoud kunt u sturen naar webmaster@keieschieters.nl