Karnevalsdínsdig, thema boore en boorinne

Ôp karnevalsdínsdig (4 mârt) stieët d’n themadaag ‘Boore en Boorinne’ wer ôp ’t programma. Net woej vörrig jaor wört dit georganizeerd beej de Hertog Jan Preuvereej en is de áfsloéting vân de Vastenaovend en ’t ballonneprikke beej kefee “De Maert”.

We zujjen ’t leuk vínde âs iederieën, net woej vörrig jaor, verkleijd kump volleges ’t thema. Natuurlik is dit neet verplich en meug-se ok in dien fenste pekske ’t fieës kômme viere!

Vânáf 13:30 oor is iederieën welkôm beej ‘De Hertog Jan Preuvereej’ waor, beej good waer, ’t fieës boéte zal zien in ’n verwermde tént. Dizze middig zien d'r ôptraejes vân Coen Janssen en ôs eige Ârcese muzikánte. Vör de blage is d'r ’n springkusse geregeld en is d'r unne kiénderdisco, verzörrigd door Niek Broeren.

Um 14:30 oor is dân ’t offiesjele áftraeje vân ôs jeugdviéftal.

Beej de Preuvereej is ’t meugelik um mit d’n Arcent te betale en ok is d'r gelaegenheid um ’n hepke te aete.

Rônd 19:30 oor gaon we naor kefee De Maert, waor tradiesjoneel de Vastenaovend zal waere áfgeslaote mit um 22:11 oor ’t ballonneprikke. Veuráfgaond ân dât ballonneprikke is ok ’t áftraeje vân ôs hoeëghede.

Weej haope oow ok dizzen daag te meuge begroete um same de Vastenaovend vân 2025 áf te sloéte.