D’n Ôpstaeker 2025, ’n ôntwaerep vân Albert Kiefer

Beej de start vân de vastenaovend ôp d’n ellefde vân d´n ellefde wört neet allieën ’t ni-je vastenaovesseizoen ôp geng geschaote, mâr is ok wer de ni-jen ôpstaeker te kriége. ’n Sieraod dât inmiddels ônmisbaar is vör iederieën in de Geminte Venlo daen de Vastenaovend ’n waerem hârt toedrug. Dit jaor is gekaoze vör de kreatieve doézendpoeët Albert Kiefer.

Albert zoog ’t laevesleech ôp Steyl, mâr woort al vlot meigenaome naor Belfeld. Dao haet haen ruum 35 jaor gewoeënd, vördât hae oéteindelik in Blierick teraech kwaom. Haen is getrouwd mit Niek, “ ’t megje vân Sounds” en ze hebbe same twieë kiénder: Bodi en Ivy.

Nao zien middelbaar ônderwiés en ’n jaor in dins, is Albert ân de slaag gegaon ôp de kúnsakademie in Maastrich. Teikene waor in zien jônge jaore zien grötste hobbie en Albert koos d'r veur um naor de kúnsakademie te gaon. Ôp good advies vân zien mooder, haet haen dao oéteindelik de richting vân lieraar gekaoze, “want dân haes-se mieër zekerheid, jông”.

'n Videoklip vân de Dire Straits wakkerde evvel ’n vlemke aan um toch wât ánders dân lesgaeve te gaon doon. ‘n Klip die gemâk waor via de kompjoéter. Dât waor d’n trigger vör Albert. Haen is inmiddels al jaore professionieël grafikus (al vlot âs zelfstandige) mit ônder ándere prachtige ôpdrachte âs ’t ôntwikkele vân ’n visualizasie vân ’t alde Fort Michel in Venlo en vör ôs Ârce haet haen de Schanstaore en Fort Hazepoeët vân de Fossa Eugeniana prachtig in beeld gebraoch. Heejbeej stieët grafiese preciezie in ’n hoeëg vaandel.

In 2016 kwaom de heimwieë naor ’t alderwetse teikene. Haen begoos ôpni-jt, net wie vroeger mit ’n schetsbook en wât kleurkes. Mit zelf ôpgelágte disipliene (iederen daag 1 teikening) kreeg daen hobbie ni-j laeve. ’n Hobbie mit groeëte gevollige: werreldwiét wört haen gevrog vör kurzusse en d'r is zellefs ’n book vân zien kreasies. Dit is mit name gerich ôp unieke schetse vân gebouwe, vörál binne de Geminte Venlo. En daormei teikende haen zichzellef “in the picture” vân d’n Ôpstaeker.

Ánders dân ándere jaore haet de ni-je ôntwaereper ierlik gezág neet zôvöl mit Vastenaovend. Vroeger âs kiénd waor haen wâl gaer te zeen âs kojboj en superhéld, mâr daornao verwaterde dât. Tóch kân haen ’t geveul vân vastenaovend prachtig belaeve én oétbeelde. Dât bliek oét ’t ôntwaerep vân D’n Ôpstaeker 2025. Twieë werrelde kwaome heejbeej same (grafies en schets) wât risselteerd in ’n prachtig 3D ôntwaerep vân ’n hieël joeksig spéldje, waor iedere vastenaovesvierder ziech beej aan kân sloéte.

D’n Ôpstaeker 2025 is vânáf de ellefde vân d´n ellefde verkriégbaar via de samewaerkende karnevalsvereniginge. D’n ôpbrings kump ten bate vân de vastenaovend binne de gánse Geminte Venlo