Bekendmâking ni-je jeugd sirremoniemeister

Maondigaovend 26 mei waor ’t eindelik zohwiét: de bekendmaking vân de ni-je sirremoniemeister! De spanning waor um te sni-je beej de jônges vân de Raod vân Ellef en de megjes vân de Prínsegarde. Alle blage verzamelden ziech same mit eur elders beej ‘Het Lokaal’ vör dit biezônder momént. Natuurlik meugde ôzzen ald-sirremoniemeister Skyler neet ôntbraeke; haen meug tenslotte de steek ôpzette beej zienen ôpvolliger.

Beej ’t naor binne gaon krege alle kiénder ’n kraskaart. De sfeer zoot d'r geliek good in. Lachende gezeechte en unne zaal vól verwáchting. Toen ’t liedje klônk begoos iederieën entoesjast mit kratse. Degene mit drie steke ôp zien kaart meugde ziech de ni-je sirremoniemeister neume! Ôzze ni-je sirremoniemeister is 𝐓𝐡𝐲𝐠𝐨 𝐒𝐦𝐢𝐭𝐬!

Wât unne gezelligen aovend vól plezeer! ’t Belof ’n geweldig seizoen te waere ônder leiding vân ôzze ni-je sirremoniemeister.