Ni-js

Algemein
Informasie CMC Alaif
27 januari 2025Kômmende vriejdig is ’t zoeëwiét. Dân is de finale vân CMC Alaif in ôs MFA De Schans.
’t Belof ’n geweldige finale te waere mit spektakulaere ekts oét gáns Limburg. Nevve de ôptraejes vân de finaliste is d'r ok ’n ôptraeje vân de winnaars vân vörrig jaor: Van Lieshout en Arts, mit euren hit: Ik Wooj Nie Gaon. In de pauze en nao áfloeëp vân de finale is d'r ’n ôptraeje vân de bend STOUT!
Belangriéke informasie vör kômmende vriejdig:
- Entree in de MFA is oétsloétend mit ticket (kân ôp papeer of via d’n tillefoon)
- D’r is gen deurverkoeëp. Haes-se nag gen ticket? Kiék dân nag snel ôp www.cmcalaif.nl. Ze zien hàs oétverkaoch!
- De deure zien aope um 19:00 oor. 't Programma start um 20:00 oor;
- Parkére (auto’s en busse) kân graties ôp de parkeerplâts vân de Kastieëltuine (Lingsforterweg 26, 5944 BE Arcen). De slaagbuuëm staon aope. De wándelroete wies ân MFA De Schans is zoeëwât 100 maeter;
- De garderaobe bedrug €1,- per jas. Dit dint kontánt te waere betâld; zörrig d'r dus veur dâs-se (minimaal) ieënen euro in de tes haes;
- Kôm vás in de stemming mit de playlist dae ôp Spotify is te vinde mit alle finaliste.
Weej hebbe d'r in ieder geval hieël völ zin in en kiéke d'r nao oét um de vastenaovendvierders oét gáns de provinsie welkôm te heite in ôs MFA. Wies vriejdig!
Karnevalsvereniging "de Keieschiéters" Ârce.
