In Memoriam: Paul Troost (Pia)

Ôp 1 november is Paul Troost, ’n aerig gewaardeerd en geliefd lid vân ôs vereniging, ovverleeje.

Sinds 2006 waor Paul lid vân Karnevalsvereniging ‘de Keieschiéters’. Haen begoos beej de Raod vân Ellef en de kemissie Kránt, waor haen respektievelik 11 en 10 jaor aktief waor. ’n Paar jaor later waor Paul betrokke beej de ôprichting vân de Groeët Ôptochbál-kemissie, waorin haen ok 11 jaor mit groeëten inzet haet meigedreid.

Ok binne de PR-kemissie leet Paul zien betrokkenheid duudelik zeen. Haen waor ieën vân de driévende krachte achter de ni-je websait, beheerde dees jaorelang en stônd daornaeve duk achter de kamera âs fotograaf tiédes ôs ivveneménte. Ok mâkte haen dieël oét vân de kemissie vör ‘t 6x11-jaörig jubileum.

In november 2017 kreeg Paul de zilvere Keieschiéter vör zien 1x11-jaörig lidmaotschap en woord haen benump tot Kommandeur in de Orde vân d’n Ârcese Kei. ’n Prachtige erkenning vör alles wât haen vör d’n Ârcese Vastenaovend haet gedaon.

Paul, bedánkt vör alles wâs-se haes beteikend vör Ârce en de Keieschiéters.