In memoriam: Wiel Rutten

Ôp 14 juni is ôzze Iéreveurzitter vân de vereniging Wiel Rutten ovverleeje.

Wiel waor vânáf 1970 beej de vereniging en haet beej de Keieschiéters zien spaore groeët en breid verdind. Haen zuj aankômmend seizoen 5 X 11 jaor lid zien gewès.

Wiel is in 1970 begoos âs lid vân de Raod vân Ellef en de Techniese kemissie. In 1971 volligde de kemissie Kránt. In 1972 kwaom Wiel beej 't bestuur en vânáf 1975 waor haen 17 jaor lang Vorst en Veurzitter tegeliek. In daen tiéd waor haen ok lid vân de Joekskemissie.

Wiel haet in 1986 ’n BCL ônderschei-jing gekrege in verband mit zien 11-jaörig Vorst- Veurzitterschap. Beej die gelaegenheid haet haen ôp 16 -11- 1986 ’t vaandel ân de vereniging geschônke.

In 1991 woord Wiel Kommandeur in de Orde vân d’n Ârcese Kei. Vör ál 't waerik dât haen ál de jaore vör de vereniging haet gedaon woord haen in 1992 Iërelid vân Verdinste. Heejbeej kreeg haen âs örste in de vereniging d’n titel Iéreveurzitter.

In 2003 haet Wiel d’n Bônten Hoephap meuge ôntvange vör ziene belangelozen inzet ôp allerlei gebiede vör de Ârcese gemínschap.

Beej 't 6 X 11 jaörig jubileum vân de vereniging waor Wiel ieën vân de inisjatiefnemers vör d’n brônze Keieschiéter, daen vândaag d’n daag te bewôndere is in ôs MFA.

Wiel, bedánkt vör álles wâs-se vör Ârce en d’n Ârcese Vastenaovend haes gedaon!