Peter (Pé) Reivers benumd in de Orde vân Oranje-Nassau

Áfgeloeëpe zôndig is Peter Reivers tiédes ’t jubileumkonsert vân Arch Luit verrast door d’n burgemeister, Dhr. Scholten. ‘t Haet de Keuning namelik behaagd um Pé te beneume tot Lid in de Orde vân Oranje-Nassau.

Pé is zeker genne ônbekende binne ôs vereniging. Haen waor Príns in 1989 en is schriéver en zenger vân völ suksésvolle karnevalsschlagers.

Ok haet haen ’n groeët aandieël gehad in ’t bedínke en schriéve vân vân de revues en de revueliedjes die in Ârce ôp de plénk hebbe gestaon. Völ jaore haet Pé ôpgetraoje ôp de bühne mit zittinge, ouvertures en nag löt haen zien liedjes huure beej Zing mei, vân Ârce en de kei.

Naeve aktief te zien binne de Keieschiéters is haen ok hieël aktief beej Arch Luit en waor haen o.a. jaorelang aktief en mei-ôprichter vân AV Flash. Ok beej de diekwachte haet haen zien stieëntje beejgedrage.

Gaer wille we Pé vân hârte fillesitére mit dees ônderschei-jing âs waardering vör ziene jaorelangen inzet vör ’t vreejwilligerslaeve in Ârce.