Lilly Kipshoven ni-je kleine Dansmarietje 2027!

Vanaovend waor ’t zohwiét: de bekendmaking vân ’t ni-je kleine Dansmarietje 2027!

Alle megjes krege unne leuke waordzeuker um ôp te losse. Mit ’t juuste ántwaord meugden ze beej de kemissie Kiénderkarneval ’n envelop gaon ôphale.

Toen iederieën die envelop in eur hand hâj, waor ’t groeëte momént eindelik daor….. Alle enveloppe woorde tegeliek aope gemâk! Oaverál kwaome gaele brifkes teveurschién, mâr d’r zoot ok ieën blauw brifke tusse. En dât blauwe brifke? Dât zoot natuurlik in de envelop vân ôs ni-je Dansmarietje 2027!

Profiesjat Dansmarietje Lilly (Kipshoven)!

Weej wínse diech ôntzettend völ plezeer en gaon d’r same unne gezellige en ônvergaetelikke karneval vân make.