Prins Barry I en Dansmarietje Lina

Op vrijdagavond 9 januari 2009 is Barry Ketels uitgeroepen als Prins Barry I van de Ârcese Keieschiéters.


 

Proclamatie Prins Barry I

Weej, Príns Barry d’n Örste,

Beej de grasie vân de Raod vân Ellef
Príns vân Ârce, zônder Lômm en Vélde,
Groëtvors in de Orde vân d’n Ârcese Kei
Kommandeur in de Orde vân d’n Hoephap,
Ridder in de Orde vân de Alde Gild,
Groëtmeister in ’t cénte binnehale vör ôs DEV,
Beschaeremhiër vân ’t zwake geslach vân ’t Lômmse Thiëtuiteriék,
Veurzitter vân alle kemmissies vân mannekoër ’t Remspaor,
Ridder in de Orde vân ’t goeëje vân 180 mit ’t darte beej de bedriéfskompetisie,
Groëtmeister in ’t verkoëpe vân alles wât mit sleutels en slaöj te make haet,
Keurvorst vân de vrindegroep de Labusse en
Biëstig grötse vader vân de kiezelstiëntjes Josje en Wouter.

Alzoë weej in ovverwaeging genaome hebbende,
dât ’t dinstig is um verordeninge te treffe in ’t belang vân ôs ônderdane, gelet ôp ’t bepaolde in artikele ellef vân ’t vastenaovesriggelemént, verordene weej en doon te wiëte:

Ten Ôrste:
Dât de Gemínt ôp de vingers is getik door ’t Gereech vör wât betreft de hoésvesting vân Poolse waeriknemers ôp kemping de “Maasvallei”.
Gemínt…. 't zuj oow toch siere âs ge ’n fatsoenlikke ôplossing zukt vör dit probleem. Staeriker nag, ik vind dât ik dât vân oow meug verwáchte.

Ten Twedde:
Dât ’t örste Skroétschfestival âs geslaag meug waere beschouwd. Ârce ging ôp ’n prachtige menier trug in d’n tiéd. ’n Kompelemént vör de organizasie en vör alle oétvoerende is ôp zien plâts en wâlgemend.

Ten Derde:
Dât de umgaeving vân ’t kaerikplein steeds laeger liek te waere. ’t Paoskantoër weg, de bánk weg en ân d’n iëne kánt vân de Wâl alle huús weg. Dit zuj ’n prima meugelikheid zien um de parkeerplâts oét te brei-je, al waor ’t mâr vör ’n paar jaor.

Ten Verde:
Dât we begoos zien ân ôs letste jaor âs zellefstandige Gemínt en dât we nao 198 jaor ôp hálde te bestaon. Laote we d'r mit allemán vör zörrige dat Ârce ok in de toekoms Ârce zal bliéve, want daoveur zien alliën weej zellef verantwaordelik en neemus ánders.

Ten Viefde:
Dât ik d'r vân ovvertuug bin dât ôs buure vân d’n Boorewaeg ôs hoés prachtig zulle versiére, mâr dât ik ’t wâl ’n bietje sneu vind vör de bewoëners vân d’n Trip, waor ik 35 jaor gewoënd heb. Mien alde buure wil ik beej deze vân hârte oétnuuëdige vör mien resepsie ôp karnevalszôndig.

Ten Zesde:
Dât de Gemínt ôs DEV good bedooch haet mit bijna viéf tôn vör ni-je kliëdkamers. Ik haop en vertrouw d'r ôp dât we mit die cénte ôs sportparrik kunne ôpkrikke vân ’n veer nao ’n viéf sterre akkemedasie. Ôp ’t véld meug ’t vân mich ándersum. Vân de viefde nao de verde klasse, want dao huuërt ôs DEV toch eigelik thoés.

Ten Zivvende:
Dât kapsalon Arts d'r neet miër is, mâr dât d'r genôg ôpvolligers zien, zoë-dât iederiën in ôs daörep d'r toch good geknip beej zal loëpe. De thoéskappers schete wie paddesteul oét de grônd. Nag efkes, dân zien d'r miër kapsalons âs kefées in Ârce.

Ten Achste:
Dât ’t örste ôntwaerep vân ’t MFA völ te deur is en dât d'r has viéf miljoen bezuinigd môt waere. Völ vereniginge in Ârce hálde eur hârt vás en zien bang dât ’t ’n gebouw wört vân: ik wil wâl mâr ik kân neet.

Ten Niggende:
Dât de keieschiéters en keieschiéterinnekes, mâr ok de kiezelstiën vân ôs Ârce steeds miër moeite hebbe um plâtse te vínde vör ’t bouwe vör d’n ôptoch. Heb ge plâts, laot oow dân huúre.

Ten Tiende:
Dât d'r völ mínse nao ’t oktoëberfiës beej de Preuvereej de jas kwiét zien gewaore, waor aerig jaomer en ’n smetje ôp dât prachtige fiës. ’n Fiës mit völ beer, Bratwurst und Lederhose, dât verdint ’t ’n moeëje tradisie te waere in Ârce. De start waor in ieder gevál völbelaovend.

Ten Ellefde:
Spring same mit mich en Lina ôp de Vastenaovestrein en Laot alle zörrig um ’t aeve. Vör ’n paar waeke is vastenaovend ’t echte laeve. Blief neet ân de kánt staon,
Want besef good: ôp Aswoensdig is alles gedaon.

Aldus gegaeve te Ârce,
Vastenaovend 2009

Príns Barry d'n Örste

McDonald's Noord-Limburg
De Keieschieters

Òntworpe & Aangedreeve door Web-id
Copyright © 2018 De Keieschiéters Ârce
Vragen of opmerkingen over de inhoud kunt u sturen naar webmaster@keieschieters.nl